Laura Taunajik Uitsatikitseq nalornivoq: Paniga Ivaaqqamiitsiinnassanerpara?

Kamanneq pakatsinerlu.

Kuummiineersup Laura Taunajik Uitsatikitsip innarluutillit angerlarsimaffiani Ivaaqqami pisut amiilaarnartut tusaramigit misigisaata tamakku ilagai.

Taassumami pania innarluutilik Ivaaqqami najugaqarpoq.

- Soorunami tusarlugu ernumaammernaqaaq. Eernumaammerujussuarpunga, misigussuserpassuit annernartut, isumaalunnerit, kamannerit, pakatsinerit sorpassuit misigisimavakka.

- Innarluutilimmik meeraqarluni, ungasillugu taamatullu tikeriaannaanagu sapinngisamik uannut tatiginninnissaq pingaarnerpaasimavoq.

AAMMA ATUARUK Annertuumik innarluutilik tallimanngormat erneriasaarpoq – ulloq unnuarlu angerlarsimaffik politiinut nalunaarutigineqarpoq

Innarluutillit angerlarsimaffianni Qaqortumiittumi Ivaaqqami najugalik 23-nik ukiulik, annertumik innarluutilik, kinguaassiutitigut atornerlunneqarsimanissaa ilimanarpoq. Taanna arajutsineqartumik naartusimalluni tallimanngormat ernertaariataarpoq.

Najugallit aaversillugillu quui misissorneqassapput

Qaqortumi politiit Ivaaqqami kinguaassiutitigut atornerluisoqarsimasinnaanera pillugu nalunaarfigineqarlutik uppernarsarpaat. Pisorli misissuiffigineqaqqissaarnera pissutigalugu piffissami matumani suliamut atatillugu oqaaseqarsinnaanani immikkoortortaqarfiup pisortaa, Søren Hansen oqarpoq.

Nuna tamakkerlugu innarluutilinnut ulloq unnuarlu angerlarsimaffiit tamarmik misissuiffigineqalersut Meeqqanut, Inuusuttunut Ilaqutariinnullu Naalakkersuisoq, Mimi Karlsen (IA) oqarpoq. Taakku saniatigut Ivaaqqami najugallit aamma aaversillugillu quui misissorneqassasut oqaatigalugu.

Meeqqagut kia paarissavai?

Taamatut suliakkiussisoqarmat, Ivaaqqamiittumut anaanaasoq Laura Taunajik Uitsatikitseq Qaqortumut paninni orninniarlugu aalajangerpoq.

- Kissaatiginikuuara paaserusullugu....naak annernaraluaqisoq, kisianni misissorneqassappat uanga nammineq najuukkusuppunga. Toqqissisimananngerujussuarpoq uanga nammineq taama ungasitsigalunga, tikeriaannaanagu nukittuniarsarilluni. Kisiannilu takusinnaallugu pisoq qanoq amiilaarnartigisoq misigisimavunga piffissaq piaarnerpaamik ornittariaqarlugu aamma taakaneereeruma aatsaat aalajangerniarlunga kissaateqassanerlunga...?

AAMMA ATUARUK Mimi Karlsen innarluutillip meerartaarnera pillugu: Eqqaaniissimasut tamarmik misissuiffigineqassapput

Soorlu sumik kissaateqarlutit?

- Ilumut Ivaaqqamiiginnassava? Imaluunniit periarfissanik allanik ujartuissaanga? Suna peqqinnarnerua? Suna orniginarnerua? Suna pitsaanerpaava paninnut uannullu? Aamma allat ineqartut eqqarsaatigalugit. Apeqquterparpassuit tikikkuma inissikkusuppakka, qanoq pisoqarniarnersoq takoqqaarniarpara. Massakkorpiaq nalilersuereerusunngilanga, Laura Taunajik Uitsatikitseq oqarpoq.

- Pisoq amiilaarnangaarmat paasisinnaarujorujussuarpara angajoqqaaqatikka allat qanoq kamatsigisut, kisianni aajuna uanga oqaatigerusutara, kamak aqqutigalugu iluarsiisinnaanngilagut , taamaattumik eqqortumik sulinissaq siunertaralugu sapinngisamik sulisuinnaanngitsut ineqartuinnaanngitsut kisiani suna tamaat ataatsimut eqqarsaatigalugu eqqarsarluatariaqarpugut.

- Ernummatigigakku suliffik taamaattoq ersisaarutigineqassappat kamammik immersorlugu, taava kia suliffigerusussavaa. Suliffissatut ornigineeruppat taavami meeqqagut kia paarissavai?