Sara Olsvig: Lars-Emil Johansenip isornartorsiuinera pissusissamisuunngilaq
Naalakkersuisoqarfiit marluk Siumuminngaanniit aqunneqaraluartut, tassalu isumaginninnermut naalakkersuisoqarfik aalisarnermullu naalakkersuisoqarfik, Inuit Ataqatigiinnut Partii Naleqqamullu tunniunneqarnerannut Lars-Emil Johansenip partiimi siulittaasuanut Kim Kielsenimut Sermitsiakkut tallimanngormat isornartorsiuivoq.
- Naalakkersuisut suliassaqarfiillu agguataarneri Inatsisartunit taasissutaanikuupput Inatsisartullu siulittaasuannit tamanna ataqqineqarnerusariaqarpoq, Inuit Ataqatigiit siulittaasuat, Sara Olsvig, Siumumi nuiamanersaat akornannittut marluk assortuunnerat pillugu taama allappoq.
- Naalakkersuinikkut suliassaqarfiit Inuit Ataqatigiinni akisussaaffigilikkavut eqqarsaatigilluagaasumik toqqagaapput. Suleqatigiinnerlu nuannaarutigaarput, Sara Olsvig allappoq, nangillunilu.
- Inatsisartut siulittaasuata tulluarissagaluarpaa nammineq partiimini tukattuliornerit nunatta inatsisartuisa siulittaasuattut inissisimanerminut akulerutinngikkaluarunigit, Inuit Ataqatigiit siulittaasuat, Sara Olsvig allappoq.