Siumukkormiu Lars-Emil Johansen Inatsisartuni qineqqusaartoqalerpat qineqqusaarniarpoq.
Nuummi Siumup immikkoortortaqarfia ippassaq unnukkut ataatsimiippoq, ataatsimiinnermi inuit kikkut Inatsisartuni qineqqusaarnissamut imminnut piukkunnersut ujartorneqarput. Radio aviisillu paasisai naapertorlugit Lars-Emil Johansen taakkununnga akuuvoq.
Ippassaq ataatsimiinnermi inuit aqqaneq-marluk piukkunneqarsimapput, taakkunannga inuit tallimat arfinillilluunniit toqqarneqartussaapput.
Taakkuli maannamut isertuunneqarallartut siulittaasuata Lars-Emil Johansenip oqaatigaa. Tallimanngorpalli aatsaat tamanna nalunaarutigineqassasoq erseqqissaatigalugu.
Taamatuttaaq Nuummi siumup immikkoortortaqarfiani siulersuisut tamanna pillugu radio aviisimut oqaaseqarusunngivipput, Lars-Emil Johansenili qineqqusaarnissamut ammalluni siornatigut oqaaseqareerpoq.
- Issiaannarsinnaanngilanga nalunagu nunaga parteeralu ajornartorsiortut. Siumumi pilersitseqataasimavunga Siumukkormiuissuullungalu, sapaatip-akunnera kingulleq taama aviisimi politikkinimi Lars-Emil Johansen issuarneqarpoq.
Ullumikkulli radio aviisimut sassarnialersaarnini pillugu oqaaseqarnianngivippoq.
Aatsaalli tallimanngorpat toqqartuisoqareernerata kingorna nalunaaruteqarnialersaarpoq.