- Ankeri ilisimasarivara inuttut nuannersutut, qiimasutut aammalu ilakkuminartutut. Aamma Kikkut tamarmik ittoorinagu siulequtaatigut, Ankerimik taagorlugu ilassiortarpaat. Taamanikkut Ankerip ministeriunerata nalaani silarsuarmi politikkikkut siuttut pingasuinnaat siuleqqiutaatigut taaneqartarput. Tassalu Fidel, Anker aamma Jonathan, Lars-Emil Johansen oqarpoq.
Anker Jørgensenip ministeriunerani Namminersornerullutik Oqartussanut tunngaviusoq hjemmestyrekommisioni pilersinneqarpoq.
Taamaattoq Jørgensen Nunatsinnit nuannarineqartuaannanngitsoq, Lars-Emil Johansenip oqaatigaa.
- Aamma Ankeri tassaavoq ministeriunertut assut kissaammertitsisarsimasoq. Aammalu ilaatigut immaqa quianarpianngitsumik pissuseqartarsimasoq. Kisiannili aamma amerlasuutigut annertuunik pisoqarnissaanik aallartitsisarsimasoq. Kalaallit Nunaat eqqarsaatigalugu, Ankerip Nunatta pisuussutaanik piginnittussaanermik piumasaqarnerput itigartippaa, Lars-Emil Johansen oqarpoq.
Ukiut 30-t ingerlareersut saammaasseqatigiinneq
Anker Jørgensenip Narsami 70-ikkunni tikeraartilluni umiarsuaq ilaaffigisaa inuusuttunit kamattunit ujaqqanik milloorneqartoq, Lars-Emil Johansenip eqqaamavaa.
- Pisimasoq taanna oqaluttuarisaanitsinni kusanaannerpaat ilaattut taarusuppara, Nunatsinni demokratiip oqaluttuassartaani kusanaannerpaartaattut taarusuppara. Taanna pillugu Socialdemokraatit Ålborgimi ataatsimeersuarnerisa nalaanni Ankeri oqaloqatiginikuuara. Tassanilu periarfissaq taanna iluatsillugu taamanikkut ujaqqanik millooqataasimasut ilaat ataaseq Ankerilu assammitsillugit immaqa imminnut saammaasseqatigiinnertut ittumik pisimasuminngaanniit ukiut 30-t qaangiutereersut ilasseqatigiisinnikuuakka, Lars-Emil Johansen oqarpoq.
Anker Jørgensenili maqaasineqartussaavoq.
- Ankerip toquneratigut inuk timimigut angisuujunngikkaluarluni politikeritut angisooq peeruppoq. Kammerat Johansenip eqqaaneqarnera ataqqinartuuli, Lars-Emil Johansen oqarpoq.
Anker Jørgensenip toqunera Naalakkersuisut siulittaasuata Kim Kielsenip alianartippaa.
- Pisoq alianarpoq. Ilaqutai misiginneqatigaagut. Politikereq nuimasooq peeruppoq. Annertuupilussuarmik partiiminut pingaartitsisoq aamma sulisartukkormiunut sullissinikoq peeruppoq. Tamanna alianarpoq, Kim Kielsen oqarpoq.
Aamma atuaruk Anker Jørgensen toquvoq
