København Løvstrædemi unnuk kulturisiorfik
Kalaallit Nunaani nalunaaqutaq marlunut Danmarkimi arfinermut aallartittumi, Københavnemi Kalaallit Illuutaanni Løvstrædemiittumi unnuk kulturisiornermi qulequtaritinneqarpoq "Qulleq - taartumi qaamaneq".
Karina Møller Løvstrædemi unnuk kulturisiorfimmi kissassaassaaq. Foto: Kalaallit Illuat
Allattoq Jaaku Lyberth
oktobarip 12-at 2018 14:29
Unnuk kulturisiorneq malunnartillugu assilisanik seqertittakkanik takutsitsisoqassaaq taakkua aaqqissorneqarput, Rasmus Nielsenimit David H. Peronardimillu. Inuuteq Storch Sisimiuneersoq assilisaminik saqqummersitsissaaq aamma Kunngissap Frederiup kalaallisut assutai saqqummersinneqassapput.
Erinarsoqatigiit MIK unnuup ingerlanerani marloriarlutik tusarnaartitsissapput, aamma Kassaaluk Qaavigaq qilaatersussaaq, taava unnuk naggaserlugu nipilersortatoqatigiit Suluit, erinarsortoralugit, Nukaaka Coster-Waldau, Karina Møller og Ilannguiaq Lumholtilu unnuap qeqqata missaata tungaanut tusarnaartitsissapput, Københavnemi kalaallit illuutaata Løvstrædemiittup nittartagaani taama allassimavoq.
