Løkkep Trump ullumi naapissavaa
Europami nunat siuttuisa sisamassaattut ministeriunerup Lars Løkke Rasmussenip (V) USA-p præsidentia Trump Præsidentip Illorsuani ullumi naapissavaa.
Danmarkip USA-llu ataatsimooqatigiissutigisaat - suliallu nunat taakku assigiinngitsumik isumaqarfigisaat - ministeriunerup ataatsimiinnermi akunnerup ataatsip missaanik sivisussuseqartumi oqaluuserisassanngortinniarpai.
- Præsidenti nutaajuvoq silarsuarmilu pissutsinik paasisaqarusulluni. Taamaammat isumaqarpunga apeqqutit assigiimmik isumaqarfiginngisatta allaanerusumik nassuiaateqarfiginissaannut periarfissaqarnissara pingaartuussasoq, Lars Løkke Rasmussen nutaarsiassaqartitsivimmut Ritzauimut taama oqarpoq.
Islamisiortut suleqatigiiffiata ISIL-ip akiorniarneqarnera Danmarkip USA-llu ataatsimoorfigaat, sulialli killilersugaanngitsumik niueqatigiinnissamut nukissiuutinillu mingutsitsinngitsunik atuinerulernissamut tunngasut avissaaqqaffigalugit.
Killilersugaanngitsumik niueqatigiinnissamik isumaqatigiissutit Trumpip atorunnaarsikkusuppai, USA-llu killilersugaanngitsumik niueqatigiinnissamik EU-mut isumaqatigiissuteqarnissaa Løkkep kissaatigalugu. Aamma silap pissusia pillugu Obamap isumaqatigiissutigisimasai Trumpip atorunnaarseqqammerpai, Løkkellu nukissiuutinik mingutsitsinngitsunik atuilernerup akilersinnaanera pillugu tunngavilersuiniarpoq.
- Nukissiuutinik mingutsitsinngitsunik atuinerup aningaasarsiornikkut siuariartornermut ataqatigiissinneqarsinnaaneranut Danmark assersuutissaalluarpoq. '80-ikkunni inuusuttuunerma nalaani Danmarkip aningaasarsiornikkut siuariartornera 80 procentimiippoq nukissiuutinik atuinerput tamarmiusoq annertusinngikkaluarlugu, Løkke Ritzauimut taama oqarpoq.
USA-p aamma piumasaraa nunat NATO-mut ilaasortaasut BNP-mik 2 procentia illersornissamut atussagaat. Danmarkip BNP-mi 1,1 procentiata missaa Danmarkimi illersornissaqarfimmut ullumikkut atortarpaa.
Nutaarsiassaqartitsivik Ritzau naapertorlugu, Trumpip atorfilittanik peqateqarluni oqaloqatigiinnerit aallartinneqannginnerini Lars Løkke Rasmussen kisimeeqatigalugu oqaloqatigiumasimavaa.
