Løkke: Kalaallit Nunaat nammineerluni aningaasarsiornerulissaaq
Nunatta aningaasarsiornerulernissamut suliffissaqartitsinerulernissamullu aqqutini nammineq akisussaaffigigaa, ministeriunerup tassani aammaarluni erseqqissarpaa.
Naalagaaffeqatigiinneq Venstrep naalakkersuisuunermi najoqqutaani qupperneq ataasingajammi sammineqarpoq. Kisianni arlaannik minitaqarsimasut, Inuit Ataqatigiinniit Folketingimut ilaasortaq Aaja Chemnitz Larsen Folketingimi ullumi tikkuaavoq.
- Naalakkersuisuunermi najoqqutassaq misissuataaraanni, inuussutissarsiutit aningaasarsiornerulernissarlu pillugit naalakkersuisut pilersaarutaannut tunngasunik allassimasoqanngilaq. Taamaammat Kalaallit Nunaanni inuussutissarsiutit aningaasarsiornerulernissarlu ikorfartornissaannut ministeriunerup eqqarsaatai tusarusuppakka, Aaja Chemnitz Larsen aperivoq.
- Kalaallit Nunaanni kissaatigineqartutut namminersornermik aaqqissuussinikuuvugut, taamaammallu aamma Kalaallit Nunaata aningaasarsiornerup oqimaaqatigiilernissaanut tunngavissaasunik aaqqissuussaanikkut iluarsaaqqinnissaq Kalaallit Nunaata nammineq akisussaaffigaa, tamatumanilu aamma inuussutissarsiutit qanoq ilillugit ineriartortinneqassanerannut, ministeriuneq Lars Løkke Rasmussen akivoq.
Isumassarsiat nunatsinninngaanneertariaqarput
Suliniutilli, aningaasarsiornerulernissamut nunatsinnilu inuit amerlanerusut sulilernissaannut aallarnisaataasinnaasut taperserusuppai. Isumassarsialli nunatsinninngaanneertariaqarput:
- Uanga oqaatigerusuppara - soorlu Naalagaaffeqatigiinneersut ataatsimiinnitsinni oqartunga, tamatumalu kingorna tamanut aamma oqartunga - qanoq oqassaanga... kalaallit saaffiginnissutaannut akiumaarpugut. Kisianni danskit naalakkersuisui Kalaallit Nunaanni aningaasarsiornerulernissamut periusissiortuussanngillat. Taamaaliorneq pisussaaffinnik paarlaassuinerussaaq, ministeriuneq oqarpoq.
Kalaallit Nunaanniit saaffigineqarnikuunngilanga
Taama oqarnera ilaatigut danskit naalagaaffiannit aningaasalersorneqartumik aningaasaliisarfiusumik aningaasaateqarfiliornissamut, Inuit Ataqatigiit sorsuutigisaannut, aamma tunngavoq.
Taamaaliortoqassappat namminersorlutik Oqartussat ilaserinnittariaqartut, ministeriuneq erseqqissaavoq.
- Aningaasaliisarfiusumik aningaasaateqarfiliornissamut suleqataaratarsinnaaneq eqqarsaatigalugu Kalaallit Nunaanniit saaffigineqarnikuunngilanga, Lars Løkke Rasmussen oqarpoq.
