Kuupik Kleist: Partiit tamarmik oqaloqatiginissaat ammarfigaarput

Inuuneq toqqissisimanartoq, imminut napatissinnaanerup aqqutissiuunneqarnissaa, ilaquttat atukkamikkut qaffassaavigineqarnissaat, inuuniarnermi ajornartorsiorpallaarata ingerlanissarput, innuttaaqatigiinni ataatsimoornerulluta suleqatigiinnerullutalu ingerlanissarput. Tassa Inuit Ataqatigiit inatsisartunut qinersinissami pingaartitaasa ilaat.
Allattoq Mads Lynge
maajip 08-at 2009 17:31

Qineqqusaarutissat Nuummi ullumi saqqummiunneqarput, qinersinermili amerlanerussuteqalissagaluarunik Siumukkunnik suleqatiserinnissinnaassappat? Siulittaasuat Kuupik Kleist ima akivoq:

- Kikkut suleqatigiissinnaaneranut Inuit Ataqatigiinnit sioqqutsisumik mattussinianngilagut. Inuiaqatigiit ajunnginnerusumik ingerlalernissaannut kikkut suleqatigiilerpata tamanna pitsaanerussanersoq suli pingaarnerpaajutipparput, Kuupik Kleist oqarpoq, nangillunilu:

- Atit, kikkuuneri, partiillu sorliunerat pingaarnerunngilaq. Inuiaqatigiit pitsaasumik ingerlaaseqarnissaat pingaarneruvoq, Inuit Ataqatigiit siulittaasuat Radioaviisimut oqarpoq.

Akitsuutinik akileeraarutinillu qaffaasoqarnissaa Inuit Ataqatigiit tapersersunngilaat, inuiaqatigiinnili nukittunerusut annertunerusumik nammataqarnissaat aammalu ikiorserneqartariaqarnermik pisariaqartitsisut ikiorserneqarnissaat Inuit Ataqatigiit aalajangiusimavaat:

- Pingaarneruvoq ilaqutariit imminnut napatissinnaanissaasa aqqutissiuunneqarsinnaanissaat, taamaatumillu isertitat akillu oqimaaqatigiinnerulernissaat aqqutissiuukkusupparput, Inuit Ataqatigiit siulittaasuat Kuupik Kleist oqarpoq.

Inuit Ataqatigiit qinigassanngortitaat 62-iupput, taakkunannga angutit 31-upput, arnallu aamma 31-ullutik. Inuusuttut qinigassanngortitat katillugit tallimaapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq