Kuupik: Dronningi qullissarmiuusimasunut ataqqinninnermik takutitsivoq
Qullissat aamarsuarsiorfiusimasoq 1972-mi matuneqarpoq, inuilu illoqarfinnut nunaqarfinnulluunniit allamut nutserlutik.
Qullissalli ippassaq uummarteqqinneqaqqittutullusooq ippoq. Tassa Ataqqinartorsuaq dronning Margrethe Aappaat uinilu prins Henrik, umiarsuarminnik aamarsuarsiorfiusimasumut tikimmata.
Qullissani peroriartortoq, Kuupik Kleist isumaqarpoq, Ataqqinartorsuup tikeraarnera qullissarmiuusimasunut ataqqinninnermik takutitsisoq.
- Isumaqarpunga qullissarmiunut tuppallersaataallunilu ataqqinninnermik takutitsinerusoq, Kuupik Kleist oqarpoq.
Qullissat oqaluttuarisaanera pillugu
Qullissat 1972-imi matuneqarnera inuisalu nuutsitaasariaqarneri, oqaluttuarisaanermut kingornatigullu naalakkersuinikkut isummertarnernut assigiinngitsutigut annertuumik sunniuteqartarput. Tamakkulu eqqarsaatigalugit, Kuupik Kleist isumaqarpoq, Ataqqinartorsuup Qullissanut tikeraarnermini tamakku uppernarsarai.
Aamarsuarsiorfiusimasumi Ataqqinartorsuup takornariarnera danskit aviisiinit allaaserineqarluartoq aamma Nunatta oqaluttuarisaaneranut qanoq pingaaruteqarsimatiginera, Kuupik Kleistip maluginiarpaa.
- Qullissat oqaluttuarisaanerata ersialaartinneqaqqilerneranik tamanna kinguneqarpoq. Takuara ullumi danskit aviisiini dronningip Qullissaniinnera annertungaatsiartumik allaaserineqarsimasoq, soorlu arlaatigut isummernertulluunniit immaqa oqaatigineqarsinnaasumik isigineqarpoq, Kuupik Kleist oqarpoq.
Prinsesse naasunik tunisimavaa
Kuupik Kleistip kunngikkormiut arlaleriarluni angalaqatigisareerpai. Taanna oqaluttuarpoq, 1960-imi suli Qullissaniillutik, dronning Margrethe taamani prinsessiulluni ilaquttani ilagalugit Qullissanut tikimmata Kuupik Kleistip aleqaata, Makkak Kleistip kunngikkormiut naasunik tunisimagai.
- 1960-mi tikeraaramik Qullissaniissimagamik, aamma taamani aleqara Makkak naasunik tunniussisuusimagami. Kunngikkormiut angalaqatigigaangatsigit taakkua eqqartullattaanikuugatsigit, Kuupik Kleist oqaluttuarpoq.
