Per Kunuk Lynge akiliisussanngortinneqarpoq

oktobarip 05-at 2004 12:35

KNR-ip siulersuisuini siulittaasuusimasoq Per Kunuk Lynge Nuup eqqartuusiviani ippassaq 5.000 koruuninik akiliisussanngorlugu eqqartuusaavoq nikanarsaataasunik ajuallatsitsisimasutut eqqartuuneqarluni.

 Per Kunuk Lynge-p oqaaserisimasaa eqqartuusivilersuussinermik kinguneqartoq tassaavoq, tusagassiortunngorniaq pillugu oqarsimammat eqqarsartaatsimigut nappaateqartuusoq, eqqarsartaatsimikkullu nappaatillit katsorsartittarfianiissimasoq.

 Ukiup ataatsip matuma siorna KNR-mi allanngortiteriniarneq pillugu eqqissiviilliortoqarneranut runngatillugu taamatut oqarsimanini pillugu unnerluutigineqarpoq.

 Per Kunuk Lynge Nuup eqqartuusiviani oqarpoq oqaatigisimasani tusagassiortunit marlunnit taamatut inernilerlugit saqqummiunneqarsimasut.

 Taamatut eqqartuusaanini Per Kunuk Lyngep ingerlatiinarlugu Nunatta eqqartuusivianut ingerlateqqippaa.