Kunngissaq: Parisimi pinerliineq ajortunit piliaavoq

Parisimi tallimanngormat unnukkut pinerliisoqarnerata kinguneranik Københavnimi ullumi eqqaaniaasoqarpoq. Tamanna pilluni, Frankrigip Danmarkimi aallartitaqarfiata silataani. Aamma naalagiaqatigiittoqarnerani Kunngissaq peqataavoq.

Pray for Paris blomster foran Den Franske Ambassade i København

Allattoq Apollo Jeremiassen, Charlotte Holten-Møller

novembarip 15-at 2015 16:00

Eqqaaniaanermi oqalugiartunut ilaapput danskit ministeriunerat, Lars Løkke Rasmussen aamma franskit Danmarkimi aallartitaa, Francois Zimeray.

Aamma immikkut ittumik naalagiartoqarpoq, tamanna franskit Reformerte Kirke-anni ingerlanneqarluni. Tassani naalagiaqatigiinnermi peqataapput kunngissaq Frederik aamma Folketingip siulittaasua, Pia Kjærsgaard taamatullu ministeriuneq Lars Løkke Rasmussen aamma peqataalluni.

Pinerliineq ajorluinnartunit piliaavoq

Naalagiaqatigeereernerup kingorna Kunngissaq Frederik attortisimaaqisoq ilaatigut ima oqarpoq.

- Pisoq tujorminarluinnartuuvoq. Pinerliineq inunnit ajorluinnartunit piliaalluni. Franskit inuiaqatigiit eqqarsaatinniisippakka, aamma Frankrigimi ilaquttakka ikinngutikkalu eqqarsaatinni najorlugit. Qujanartumilli taakku pinerliinermi eqqorneqanngillat, Kunngissaq Frederik oqarpoq.

Taanna nangilluni aamma ima oqarluni.

- Affarmik uattut franskiulluni nunarsuarmioqatigiinnut pinerliineq soorunami attortissutigaara annertuumik amma tamanna nunami allami pisimagaluarpalluunniit qamuuna annertuumik attortissutigissagaluarlugu, Kunngissaq Frederik Danmarks Radiomut oqarpoq.

Aamma atuaruk Kalaaleq Parisimiittoq: Takusat amiilaarnaqaat