Kunngissaq inuuissiornermini arpannissamut qaaqqusisoq

Kunngissaq Frederik aappaagu maajip ulluisa 26-anni 50-iliissaaq.

Taanna ippassaq 49-liivoq. Tassanilu nalunaarutigaa, aappaagu 50-iliiguni Danmarkimi illoqarfinni tallimani arpanniarluni.

Danskillu arpaqatigerusuppai. Taamaammat Aalborgimi, Aarhusimi, Esbjergimi, Odensemi Københavnimilu arpannissamut qaaqqusivoq.

Tamanit peqataaffigineqarsinnaasoq

- Aappaagu 50-iliinera Danmarkip tamaat peqataaffigisinnaasaanik arpannermik malunnartinniarpara. Timersornermik, minnerunngitsumillu arpannermik soqutigisaqartuaannartuuvunga, kunngissaq tusagassiuutinut nalunaarummi allappoq.

- Royal Run arpattartunut misilittagaqarluartunut naatsorsuussaavoq, kisianni aamma arpaatsileqqaartunit peqataaffigineqarsinnaassalluni. Kikkut tamarmik qassinilluunniit ukioqaraluarunik tikilluaqqusaapput, kunngissaq Frederik allappoq.

Taanna 50-iliiguni Københavnimi, Aalborgimi, Aarhusimi, Esbjergimilu 1,6 kilometerinik arpanniarpoq.