Kulusummi qimmit naapaalanerat ilimagineqartoq
Kulusummi qimmit qimmit nappaataannik nappaalanersut uumasut nakorsaanit suli uppernarsarneqanngilaq, tamannali misissorneqarpoq. Qimmiutillilli piaartumik misissuisoqarnissaat ujartorpaat.
- Uagut qimmiutillit isumaqarpugut piaartumik uumasut nakorsaanit nalilersuisoqarnissaat kissaatigaarput misissuisiqarnissaat. Eqqortumik sukumiisumillu paasineqarniassammata ilumut qimmit nappaataasimasinnaanersoq taanna toqussutigisartagaat, taamaalilluni allanut nunaqarfinnut siaruannginnissaat kissaatigalugu qimmeqarfinni, Pele Maratse taama oqarpoq.
Taassuma oqaatigaa Kulusummi qimmit 300-t missaanniittunit maannamut sisamat toqoreersimasut. Taakkulu qimmit nappaataannik nappateqarsimanissaannut ilisarnaataasinnaasunik takupput, soorlu qimmit ersiutaasa ilagaat anniarpasillutik noqartarput masseriapiloortarlutillu.
Nunaqarfimmiulli kissaatigaat piaartumik ikiorserneqassallutik, qimmiaqqammi pituutaqaratik angalaannartut tunillanneqarnissaminnut tuniluussuinissaannullu aarlerinarmat.
- Qimmiaqqat pituutaqanngitsut amerlavallaarlutik angalaannartut tuniluussinnaanerat pinaveersimatinneqassappat piaartumik ilisimasalimmik, ilisimatitsissumik paasissutissanillu tunniusisoqarnissaa kissaatiginarpoq, Kulusummi KNAPP-mi siulittaasoq Pele Maratse Marie Kuitse Kristensenimut taama oqarpoq.