Kulturikkut nersornaat kajumissaasiullu tunniunneqartut
Kulturikkut Nersornaatit qimussertartumut Ville Siegstadimut tusagassiortumullu Niels-Henrik Lyngemut tunniunneqarput, kajumissaasiullu nipilersortartumut tassa rappertartumut Josef Tarrak Petrussenimut tunniunneqarluni.
Kultureqarnermut Naalakkersuisup, Doris Jakobsenip nersornaatit taakku marluk Inuiattut Ullorsiorfimmi Katuami juunip 21-ani tunniuppai.
Ville Siegstad qimussimik sukkaniuttarnerup iluani ataqqisaalluni ilisimaneqarluartuuvoq, Ilulissani Qeqertarsuullu Tunuani sukkaniuttarnernut amerlaqisunut 1975-imiilli peqataasarsimavoq, kiisalu Avannaata Qimussersua 1989-imili aallartimmat peqataaffigisarlugu.
Kulturikkut nersornaaserneqartup aappaanut Doris Jakobsen ima oqarpoq:
- Nipaa tusagassiuutitigut, kulturimut tunngasutigut oqaatsitigullu pikkorinnermigut Niels-Henrik Lynge ilisarisimaneqarluarpoq.
Rappertartumut kajumissaasiunneqartumut ilaatigut Doris Jakobsen oqarpoq:
- Nipilersorluni videoliaani erinarsuut ”Tupilak”, siorna saqqummersitaa, erinarsuutaavoq sakkortooq. Taalliortoq pisartunut isertuanngitsumik inuiaqatigiinnut oqariartortarnera tamatsinnut eqeersaataavoq.