Kullorsuarmi piniartut franskit filmiliaanni pingaarnertut inuttaasut
Franskit filmiliaat nutaaq "Inupiluk"mik taaguuteqartoq Canadami Montrealimi filmfestivalertoqartoqarnerani ulluni makkunani takutinneqaqattaarpoq.
Nunaqarfimmi Kullorsuarmi piniartut marluk Ole Eliassen aamma Adam Eskildsen, naliginnaasumik piniarneq qimussernerlu aallutarisarpaat. Siornali aasakkut allaalluinnartumik misigisaqarsimapput, tassa Parisiliarput franskit filmiliortartut filmiliaanni pingaarnertut inuttaallutik.
Siullerpaamik Nunarput qimallugu angalapput
- Siullerpaamik Kalaallit Nunaat qimallugu angalavugut. Ilaanarsuaq nuannisaqaagut, filmiliaritinnitta saniatigut arlaannut aamma takornarialaartaratta, Ole Eliassen sapaatip akunnera Parisimiissimasoq taama oqaluttuarpoq.
Olep filmiliornermi aaqqissuisuusoq, Nicolas Dubreuil, ilisarisimareerpaa, aperimmanilu Frankrigimut tikeraarusunnersoq kammani akueraa.
-Kammaqaratta franskeq maannga Kullorsuarmut ukiuni kingullerni arlalinngulersuni tikeraartartoq, manna nuannarisorujussuugamiuk. 2012-imi ukiukkut tikeraarnermini aperivaanga frankrigimi tikeraarusunnersunga, akueraara.
Olep Frankrigimut tikeraarnermini nunaqqatini, Adam Eskildsen ilagaa, taakkulu marluullutik Parisimi filmiliaritillutik.
Ole Eliassen aamma Adam Eskildseni igeriussissummi ilaasut uani takuuk.
Uumasuusivissuarmut pulaarneq sinnattortitsivoq
Filmi "Inupiluk" tassaavoq, piniartut Kullorsuarmiut marluk nunamut allamut tikeraarnerat pillugu oqaluttuaq. Filmimi Ole aamma Adam malinnaavigineqarput, Parisimi sapaatip akunnerata ataatsip ingerlanerani misigisaat filmiliarineqarlutik. Kalaallit piniartut kulturimi allarluinnarni qanoq misigisaqarnersut filmimi takutinniarneqarpoq. Piniartut marluk illoqarfissuarmiinnerat, illoqarfissuup avataani orpippassuarniinnerat ilaatigullu uumasuusivissuarmut pulaarnerat, filmimi takuneqarsinnaapput.
-Filmimi Adam sinnattortippaat qungasersooq takullugu, taavalu Adamip aallaallugu sinnattumini. Kalaallit Nunatsinni piniakkat uumasullu pisarisinnaasagut takugaangatsigit aallaasarpagut, taamaammat Adami taamatut takorluuitissimavaat, Ole Eliassen taama oqaluttuarpoq.
