Kukkunersiunermut ataatsimiititaliap nalunaarusiaa 28 november kingorna saqqummiunneqassaaq
Kaammatuuteqartut tassapput Kristian Jeremiassen aamma Per Berthelsen Siumut, Hans Enoksen Partii Naleraq aamma Agathe Fotain IA.
Inatsisartunut qinersineq sioqqullugu nalunaarusiap saqqummiunneqarnissaa pisariaqartoq taakkua isumaqarput.
tamanna pisinnaanngitsoq Inatsisartut Allattoqarfiata nalunaarutigaa.
Inatsisartut Allattoqarfiat sinnerlugu matumuuna ilisimatitsissutigineqassaaq qinersinerup kingorna Kukkunersiuinermut Ataatsimiititaliamik nutaamik qinersisoqarnissaata tungaanut inatsisitigut periarfissaqanngimmat misissuinermit nalunaarusiap tamanut saqqummiunnissaanut, Inatsisartut allattoqarfiat tugassiuutinut nalunaruteqarluni taama allappoq.
Qinersinissamik nalunaaruteqarnerup nunatta aqunneqarnera eqqarsaatigalugu inatsisitigut malitsigaa Inatsisartut atuukkunnaarnikuummata. Taamaalilluni Kukkunersiuinermut Ataatsimiititaliaq aamma atuukkunnaarnikuuvoq. Taamaattumik Inatsisartut Kukkunersiuinermullu Ataatsimiititaliaq tamarmik misissuinerup inernerata tamanut saqqummiunneqarnissaanik aalajangiisinnaassuseqanngillat.
- Tamannalu inatsisitigut pissutsit ullumikkutut itsillugit Inatsisartut Siulittaasoqarfiata, Inatsisartut Allattoqarfiata, partiit siulittaasuisa, Inatsisartuusimasunut ilaasortat allalluunniit allanngortissinnaanngilaat, Inatsisartut Allattoqarfiat taama allappoq.
Taassuma aamma uppernarsarpaa misissuisitsineq Kukkunersiuinermut Ataatsimiititaliaasimasup inniminnersimasaa Deloittep naammassisimammagu. Misissuisitsinerup inernera Kukkunersiuinermut Ataatsimiititaliaasimasoq sinnerlugu Allattoqarfimmit tiguneqarpoq ingerlaannarlu allakkat puuannut matoqqasumut ikineqarpoq tiguneqarnermilu kingorna ammarneqarani GrønlandsBankenimi aningaaserivimmi ilisivimmut parnaartartumut ilineqarluni. Taamaalilluni Inatsisartut Allattoqarfianni inatsisartunulluunniit ilaasortaasimasut arlaannaataluunniit sunnguamik periarfissaqarsimanngilaq nalunaarusiap atuarnissaanut, Inatsisartut Allattoqarfiat ilisimatitsivoq.
