Kukkunersiuisut: Nalunaarut mianersortumik tiguneqartariaqarpoq
Nunatta Ammerivia 2013-mi 5,9 million koruuninik sinneqartooruteqartoq ukiumoortumik nalunaarummi atuarneqarsinnaavoq.
Allattoq Thora H. Nielsen
juunip 26-at 2014 15:35
Sinneqartoorutinulli ilanngunneqarsimapput Great Greenlandip siusinnerusukkut suleqatigisimasaminik, tassalu North Atlantic Fur Group-imik eqqartuussivilersuussiniarnermini 32 million koruuninik piumasaqarnera.
Maannalu apeqqutaasussanngorpoq eqqartuussivilersuussiniarnermi ajugaassagaluaruni aningaasat akileqqusani ilumut aamma tigusinnaassanerai.
- Aningaasat tigusinnaanissaat soorunami nalunartoqarsinnaavoq, eqqartuussivilersuunniakkavut 2013-imut ukiumoortumik suli nalunaarusiornikuunngimmata, Great Greenlandip pisortaa Lars Berg Sørensen oqarpoq.
Ukiumoortumik nalunaarut mianersuunneqartariaqartoq kukkunersiuisut Deloitte nalunaarummi aamma erseqqissaatigaat. Aningaasat piumasarineqartut 32 million koruunit tiguneqanngippata suliffeqarfik Great Greenland 26,6 million koruuninik amigartooruteqassaaq.
-Tassa tigunngikkutsigit annaasaqatigissavavagut, tamanna ukiumoortumik nalunaarummi aamma atuarneqarsinnaavoq, Lars Berg Sørensen nassuiaavoq.
Great Greenlandip eqqartuussivilersuussinertaqanngitsumik isumaqatigiinniarnissamut aggersaaneranut North Atlantic Fur Group takkutinngimmat inuinnartut eqqartuussivikkoorlugu suliassanngortitsivoq.
Great Greenlandip aningaasaqarnera ilungersunartumik inissisimavoq, aningaasammi tigoriaannaat siorna ukiup naanerani minus 29,5 million koruuniusimammata, ukiup siulianut naleqqiullugit 12,6 million koruuninik amerlanerullutik.
Tusarluarnartoqarporli, tassami nunatsinni nunanilu allani tunineqartut katikkaanni marloriaatingajammik amerlisimammata, naak North Atlantic Fur Group-ip Danmarkimit siorna ukiup affaani kingullermi tunisaqarsinnaasimanngikkaluartoq.
Nunatsinni ammit tunineqartut siorna 10.000-iupput, nunani tamalaani tunineqartut 99.000-iupput, taakku katikkaanni 109.000-iupput. Ukiup siuliani tunineqartut katillugit 62.300-simapput.
