Kujataani tunisat ikileriarujussuartut
Kommune Kujallermi inuussutissarsiornermut suliffeqarnermullu ingerlatsivik naapertorlugu tamanna isumaginninnermi aningaasartuuteqarnerulernermik kinguneqarpoq.
- Assut erloqinarpoq, Kommune Kujallermi inuussutissarsiornermut suliffeqarnermullu ingerlatsivimmi pisortaq Palle Frederiksen oqarpoq.
Ingammik Qaqortumi tunisat ikileriarujussuarput.
Qalerallit saarulliillu 2016-imi qaammatini siullerni arfineq-pingasuni tunisat 910 tonsiupput. Kalaallit Nunaanni Aalisarsinnaanermut Akuersissutinik Nakkutilliisoqarfik naapertorlugu ukioq manna tunisat maannamut 31 tonsiinnaapput.
Narsami tunisat aamma ikilipput. Siornami tunisat 333 tonsiusut ukioq manna 263 tonsiupput. Tunisat taamaasillutik 21 procentinik ikileriarsimapput.
Nanortalimmi tunisat ukiup siulianut sanilliullugit ukioq manna 33 procentinik ikinnerupput, tassalu ukioq manna tunisat 2015-imisulli ikitsigilerlutik.
Tunisallu ikileriarujussuarnerat kommunip karsianut kinguneqarpoq. Suliffissaaleqisummi amerliartortillugit kommunip isumaginninnermut aningaasartuutai amerlanerulersimapput:
- Aningaasartuutit aggustip naanerani 66 procentiusussaagaluarput, maannakkut kommunimut aningaasaliissutit 78,5 procentii atoreerput, imatut paasillugu aningaasaliissutinit 6,5 millionit koruuniusunit fem millionit sinnilaarlugit atoreernikuupput.
Palle Frederiksenip ilanngullugu oqaatigaa maanna ukiami ukioruluunniit tunisassiortoqarunnaarnissaa naatsorsuutigineqarmat, kommuni tapiissutinik qinnuteqartariaqalersinnaasoq.
