Kujataani sumiiffiit nunarsuarmioqatigiinnut eriagisassanngortikkusukkaat

Kujataani nunaminertat Nunatta oqaluttuarisaaneranut pingaarutillit immikkut eriagisassatut UNESCO-p allattorsimaffianut, tassa Naalagaaffiit Peqatigiit ilinniartitaanermut, ilisimatusarnermut kulturimullu Suleqatigiiffiata allattorsimaffianut ilanngunneqarnissaannut qinnuteqaat piariingajalerpoq, Kujataani nunap immikkoortui ilaat Ilulissat kangiata eriagisassatut UNESCO-p allattorsimaffianut ilaaneratut allattorsimaffimmiilernissaannut qinnuteqaat piariingajalerluni.
Assi © : Grønlands Nationalmuseum og Arkiv
Allattoq Karsten Sommer
januaarip 27-at 2016 05:41
Nutserisoq Mads Lynge

Qinnuteqaat ukiorpaaluni piareersarneqareerluni Unescomi immikkut ilisimasalinnut piariingajalersoq, aviisip ullormut saqqummersartup Kristeligt Dagbladip allaaseraa.

Kujataani nunap immikkoortui katillugit tallimat pineqarput, qallunaatsiaat Erik Aappalaartoq siuttoralugu ilaatigut najugaqarfigisimasaat, nunaateqarfgisimasaallu Unescop allattorsimaffianut ilanngunneqarnissaat qinnuteqaatigineqarluni.

- Qallunaatsiaat nunaateqarnermik ilisimasaqarput, uumasunik miluumasunik Davis Strædemi piniartarnermi saniatigut nunaateqarsinnaasimallutik. 1400-kkunnilu tammarnerisa kingorna naggueqatigiit Inuit 1700-kkunni assingusumik tamaani inuulersinnaasimallutik. Takussutissat immikkuullarissut tamaani siumorneqarsinnaapput, Slots- og Kulturstyrelsemi immikkut siunnersorti Bolette Lehn Petersen, Kristeligt Dagbladimut oqarpoq.

Aamma atuaruk ASSIT Sumiiffiit uku tallimat nunarsuarmioqatigiinnut eriagisassanngortinneqarsinnaapput

Taassuma Namminersorlutik Oqartussat, Kommune Kujalleq Nunatta Katersugaasivia Allagaateqarfialu peqatigalugit qinnuteqaat piareersarsimavaa:

- Suleqatigiit savaatillit politikerillu ataatsimeeqatigisimavaat, kikkut tamarmik pisunut tamanut ilaatinneqarnissaat qulakkeerniarneqarluni. Qinnuteqaat akuerineqassappat assigiinngitsunik kinguneqarsinnaassaaq. Takornariat amerlisinnaassapput, soorlu aamma nunaminertani pineqartuni aatsitassarsiortoqannginnissaa qulakkeerneqarsinnaassasoq, Bolette Lehn Petersen oqarpoq.

Danmarkip kultureqarnermut ilageeqarnermullu ministeriata Bertel Haarderip qinnuteqaat pisortatigoortumik atsiortussaavaa, qinnuteqaammullu kingusinnerpaamik aappaagu akissuteqartoqartussaalluni.