Kujataani piareersalerput
Kujataani kommunit peqatigiiffiani siulersuisut oktoberip aallaqqaataaniit pingajuanut ataatsimiimata, allaffissornikkut suleqatigiinissamut misissuinerit aallartinneqassasut aaliangiunneqarpoq.
Suleqatigiissitanik pilersitsisoqartussanngorpoq, Narsap, Qaqortup Nanortallillu kommuniini aningaasaqarnermut pisortat, akileraartarnermilu pisortat suleqatigiissitami ilaasortaasallutik.
Taakua suliarissavaat suleqatigiinissami ajoqutaasinnaasut pitsaaqutaasinnaasullu misissussallugit. Tamatumani aamma nunap immikkoortuani ataatsimoortumik suleqatigiittoqarsinnaanersoq misissorneqassalluni.
Taamatut oqallinnermi ilanngullugu isumaqatigiissutigineqarpoq, misissorneqassallunilu kommunini pingasuusuni ataatsimoorussamik akileraaruserisoqalissasoq, taanna Nanortalimmut inissinniarneqarpoq, kiisaku akissarsialerineq Narsamut inissinniarneqarluni.
Aamma kujataani kommunit pingasuusut isumaqarput, kulturikkut suleqatigiineq annertunerusumik ingerlanneqartariaqartoq, taamaaliornikkut timersorneq kulturikkullu suleqatigiineq annertunerusoq ataqatigiisarneqarlunilu annertusarneqassammat.
