Kujataani misileraalluni saarullinniarnissaq isumalluarnartinneqartoq

Suliffeqarfik taanna pisassiissutissanik ukiualunni pissarsisinnaanikuunngeriarluni misiliutitut aalisagassanik 1000 tonsinik pisassinneqarsimavoq. Aalisakkanik tarajortikkanik Alluitsup Paani tunisassiornerup taamaasilluni annertusineqarssinnaanissaa periarfissanngorpoq.

Narsaq Seafoodip 2015-imi annertunerusumik pisassinneqarsinnaanissaa, Narsami tunisassiorfiup ingerlatsinermut pisortaata Klaus "Nuka" Andreassenip neriuutigaa, saarullinnik amerlanernik Narsami tunitsivimmut tulaassisoqartalersinnaanissaa neriuutigalugu.

Aalisariut nutartigaq atorneqartoq

Aalisariutip "Polar Nuka"-p, Svendborgip amutsiviani iluarsaanneqareernermi kingorna pisassiissutigineqartunik nutaanik aalisarsinnaalersimavoq, atortunillu nutaanik kingorna aamma atorlulersorneqarsimalluni.

Aalisariut Polar Seafoodimit pigineqartoq, kujataani saarullittassanik aalisarnissamut atorneqarpoq, Narsaq Seafoodimiillu Polar Seafoodimiillu ingerlanneqarluni.

Inuussutissarsiuteqartut pitsaasunik atugassaqartinnerat ineriartornermik pilersitsisarpoq

Narsaq Seafood inunnik 30-nik ukioq naallugu sulisoqartarpoq, taakkunannga arfineq-pingasut aalisariummi inuttaallutik.

Saarullinniarnerup imminut akilersinnaalernissaa, Polar Seafoodip siulersuisuisa siulittaasuata Henrik Lethip naatsorsuutigaa, suliffeqarfiillu piorsarneqarluarnerannut aamma takussutissaalluarnerarlugu, suliffissaqartitsiniarnermut iluaqutaanerarlugulu. Allatulluunniit oqaatigalugu:

- Amerlanerusunik pisassiisoqaraangat suliffissanik amerlanerusunik aamma pilersitsisoqartarpoq, Henrik Leth erseqqissaavoq.