Kujallermi ujaasineq pujorpallaarnera pissutigalugu unitsiinnarneqartoq
Inuit marluk umiatsiaaqqamik angalasut Qaqortumi politiinit ujaarineqarput. Ujaarineqartut kingullermik takuneqarput Qaqortumi maajip tallimaani.
Egede Sakariassen aamma Kaaka Joelsen, Qaqortumi maajip tallimaani nalunaaqutaq ualikkut pingasut missaani kingullermik takuneqartut Qaqortup politiivinit ujaarineqarput.
Politiit tusagassiorfinnut nalunaaruteqarlutik ilisimatitsissutigaat ujaarineqartut marluusut nunaqarfimmit Saarlumit qassusersoriartorlutik kangimut aallarsimasut.
Qulimiguulik Bel 212 aamma sakkutuut timmisartuat Challenger atorlugit ippassaq ataasinngornermi ujaasisoqarmat ujaarineqartut nassaarineqanngillat. Kujallermi politiini ulluinnarni aqutsisoq Jack Nathansen KNR-imut ilisimatitsivoq.
- Alluitsup Paanit Simiutap tungaanut sissaq sinerlugu taamaallaat ujaasivugut, pujorpallaarnera pissutigalugu avammut ujaasisinnaannginnatta, Jack Nathansen oqarpoq.
Ullumi marlunngornermi ujaasinissaq pujorpallaarnera pissutigalugu unitsiinnarneqartariaqarsimavoq, umiatsiamilluunniit ujaasinissaq ajornarmat.
- Silap qanoq innera malinnaaffigissavarput qanorlu iliussanerluta nalilersorlugu, Jack Nathansen oqarpoq.
Umiaatsiaaraq angallatigisaat tassaavoq With 400, 16 fodsi sungaartumik qalipaatilik tungujortumillu qulerualik tungujortunillu issiavilik. Mercurymik 40 hk-mik qernertumik motooreqarpoq. Politiit paasissutissaataat naapertorlugit ujaarineqartut VHF-radioqaratik aallarsimapput.
Ujaarineqartullu tungujortumik qalipaatilinnik atallaarsuaqarput sungaartunillu aappaluaartunik sialussiutinik qarleqarlutik.
Politiit SAR-imik ujaasititsipput, imaatigut silaannakkullu. Arfininngormat, sapaatiummat ataasinngormallu ujaasisoqarpoq umiaatsiaararli inuillu ujaarineqartut nassaarineqanngillat.
Politiit maannamut paasiniaanerat naapertorlugu, ujaarineqartut kingullermik Qaqortumi maajip tallimaani 2017 nalunaaqutaq 15.00-ip missaani takuneqarput, kingornalu qanoq pisimanerat ilisimaneqarani.
Ujaarineqartut maajip tallimaata kingorna qanoq pisimanerinik ilisimasaqartut Qaqortumi politiinut oqarasuaatikkut 70 11 22-kkut sianerlutik saaffiginnissuteqarnissaat politiinit kajumissaarutigineqarpoq.
AAMMA ATUARUK Umiatsiaaqqamik angalasut marluk politiinit ujaarineqartut
