Siunnersuut: Kujallermi sulisut pujortarunnaassapput

Kommunep suliffeqarfiini tamani sulinerup nalaani pujortaqqusiunnaarnissap misissuiffigineqarnissaanik tamanna inerneqarpoq.  

Siunnersuut meeqqerivinni sulisut akueriuminaatsippaat.

Meeqqeriviit ilaanni Inneriilani sulisut ilaata pujortarneq ajoraluarluni sulisut pujortaqqusaajunnaarnissaat akueriuminaatsippaa.

- Isumaqatigivallaammgilara. Pujortartartut nallinnarpallaassaqaat, Hansine Kleist oqarpoq. 

AAMMA ATUARUK Peqqinnissaqarfimmi pujortartartukillissasoq

Sulisut tusarniarneqassapput

Kommune Kujallermi Kommunalbestyrelsimi IA-p ilaasortaatitaasa ilaat Naja Lund pujortaqqusiunnaarnissamik siunnersuuteqartuuvoq.

- Meeqqeriviit atuarfiillu saneqqukkaangakkit sulisut meeqqat isigitillugit pujortartut takusarpakka, 
siunnersuuteqartoq, Naja Lund oqarpoq. 

Siunnersuulli imaaliallaannaq aalajangiivigineqarsinnaanngitsoq, borgmesteri Kiista P.Isaksen oqarpoq.

- Inatsisitigut suut periarfissaanersut misissorneqaqqaassapput, pineqartullu tusarniarneqarlutik, borgmesteri Kiista P. Isaksen taama oqarpoq.

Pujortaqqusiunnaarnissamulli siunnersuut borgmesterip ajoriffissaqartinngilaa.

- Pujortartarneq peqqinnanngitsoq ilisimavarput. Taamaammat pujortartartut maligassiuisutsialaanngillat. Tamatta peqqinnerulissagutta maligassiuisariaqarpugut,
Kommune Kujallermi borgmesteri Kiista P. Isaksen taama oqarpoq.  

Kommunellu suliffeqarfiini sulisut tusarniaqqaarneqassapput, inatsisitigullu periarfissat misissorneqaqqaassallutik.

Meeqqerivinni kommuunillu suliffeqarfiini tamani pujortaqqusiunnaarsitsiniarneq, kommune kujallermi kommunalbestyrelsimi ilaasortat tulliani ataatsimiilerunik uterfigeqqittussaasavaat.