Kujallermi inuuniarnikkut naligiinnginnerujussuaqartoq
- Meeraqarpoq ajoraluartumik annertuumik sumiginnagaasunik, Meeqqat Illersuisuat, Aviâja Egede Lynge, oqarpoq, assersuutigisaalu ilaatigut ukuupput:
- Meeqqat sumiginnagaanerannut paqumaginninneq kanngutsaatsuliorfigineqarnerallu aamma assersuutigalugu.
AAMMA ATUARUK Kujallermi meeqqat naligiimmik ikiorneqanngillat
Angerlarsimaffimmi imigassamik ikiaroornartumillu atornerluinerit pissutaallutik meeqqat angerlarsimasinnaanatik imaluunniit toqqissisimanatik angerlarsimarusukkunnaarlutik silami unnukkut angalaaginnalertartut, Meeqqat Illersuisuata aamma maluginiarsimavaa.
Kommune Kujallermi inooqatigiinnermi naligiinnginnerujussuaq aamma ersarittoq, taassuma oqaatigaa:
- Assigiinngitsutigut ikiorserniarneqarnissamut immaqaluunniit periarfissat eqqarsaatigalugit naligiinnginneq aamma ersarilluni.
Meeqqat pisariaqartitanik tunngaviusunik, soorlu assersuutigalugit nerisassanik atisassanillu, amigaateqartut, Meeqqat Illersuisuata oqaatigaa.
AAMMA ATUARUK Kommune Kujalleq Naalakkersuisunut ikioqquvoq
Kommune Kujallermi isumaginninnikkut pissutsit alianartuusutut, Meeqqat Illersuisuata misigai.
- Nunatta sinnerini takusartakkagut takoqqippagut. Tassalu kommunit inunnik isumaginninnermut taavalu aamma meeqqanik ikiorsiiniarnissamut annertuumik artorsarneri ersarittorujussuuvoq.
Meeqqat Illersuisuat angajoqqaanut sumiginnaasunut perorsaasinnaanngitsunullu sakkortuumik avoqqaarinnippoq.
Tamatumanilu kommuni pingaarutilimmik suliassaqarpoq.
- Kommunip pisussaaffigivaa angajoqqaat angajoqqaaniarnerminni ajornartorsiutillit ikiorsissallugit siunnersussallugillu, Meeqqat Illersuisuat, Aviâja Egede Lynge, oqarpoq.
