Kujallermi eqqakkat ajornartorsiutaanerat anigorniarneqarpoq

Kujallermimi nunaqarfinni aqqaniliusuni arfineq pingasut ikuallaaveqanngillat.

Taamaalilluni eqqakkat nunami ikuallanneqartarput.

Eqqakkallu nunap qaaginnaaniittut siuaruaatsinnaveersaarniarlugit iliuuseqartoqarsinnaasanngimmat tamanna ajornartorsiutaavoq.

Kommune kujallermi nunaqarfiit ilaanni Aappilattumi nunaqarfinni allanisulli eqqakkat nunami ikuallanneqartarput.

- Eqqakkat katersorneqariarlutik nunap qaavani ikuallanneqartarput,

Kommune Kujallermi Aappilattumi Narsarmijini Tasiusamilu nunaqarfimmi aqutsisut siulitaasuat Angaju Manassen taama oqarpoq.

Eqqakkalli katersorneqarlutik ikuallanneqannginnerini anorlertillugu teqqaatinnginissaat iliuuseqarfigineqarsinnaasanngilat. Tamannalu ajornartorsiutaavoq.

AAMMA ATUARUK Sermersuup illoqarfiinit nunaqarfiiniillu eqqagassat assartorneqartartut

- Eqqakkat ikuallaneqartinnagit katersorneqartut, anorlilerpat teqqaatilerpata taakkua suneqarsinnaanngillat tamanna avaqqunneqarsinnaanngilaq, Angaju Manassen oqarpoq.

Nunattali kitaani plastikkit eqqakkat amerlasoorujussuusut, aammalu eqqakkat 80 procentii nunameersuusut ilisimatuup Jakob Strandip misissuinermini paasivaa.

AAMMA ATUARUK Nunatta imartaani plastikkinik ulikkaartoq

Eqqakkallu eqqaavissuarni ammaannartuniittumiittut teqqaanissaat pinngitsoorniarlugu assiaqusersorneqarsinnaasut Angaju Manassen siunnersuuteqapoq.

- Eqqakkat katersorneqartut ikuallanneqartinnagit ungalulersorneqarsinnaasuuppata pitsaanerpaassagaluarpoq, nunaqarfimmi aqutsisut siulittasuat Angaju Manassen taama oqarpoq.

Aappilattumili Kommune Kujallermilu nunaqarfinni allani ikuallaaveqanngitsuni aaqqiissutissamik kommune suliaqarpoq.

Kommuneqarfik Sermersuumi eqqagassat nunaqarfinni ikuallaaveqanngitsuniittut illoqarfimmut assartorlugit ikuallaaviliaanneqartarput. Assartuisarnerlu kommunet sinnerinit atulerneqartussatut piareersarneqarpoq. Aamma Kommune Kujallermi.

Nunaqarfinni eqqakkat silaannarmik naqitsissumik naqitat katersoriarlugit Qaqortumi eqqakanut ikuallaavimmut

nassiuneqartarlernissaannut piareersartoqarpoq, - eqqakkanik immikkoortiteriveqalissaaq, ikuallassinnaasullu eqiterivimmi eqiteriarlugit Qaqortumi ikuallaavimmut nassiunneqartassapput, Kommune Kujallermi teknikeqarnermut immikkoortortaqarfimmi ulluinnarni aqutsisoq Anders Mathiesen taama oqarpoq.

Eqqagassanut ikuallassinnaasunut naqitsilluni eqiterivimmik Kommune Kujalleq pisinikuuvoq, pilersaarutaavorlu nunaqarfiit sinneri angissutsinik assigiinngitsunik naqitsissutinik eqiterivinnik kompressorinik pisinnissaq.

Eqqakkanut immikkoortiterivik eqqakkanik naqitsissut siulleq Eqalugaarsunni misilittarneqareerpat, nunaqarfiit sinneri eqqakkanut immikkoortitserivimmik naqitsissutinik pilersorneqarnisaat.