Kujalleq mittarfiliornerit kinguartinneqarnerat kamassutigigaa
Kommune Kujallermi Kommunalbestyrelsi ataatsimoorluni sakkortunerpaamik Naalakkersuisunut ammasumik allagaqarluni noqqaassuteqarpoq Kalaallit Airports A/S piumaffigineqassasoq Qaqortumi mittarfissap tulleriiaarinermi kingullinngortinneqarnera allanngorteqqullugu.
Nunatsinni mittarfittaassat pingasut pilersaarutaasumut naleqqiullugit kingusinnerusukkut naammassineqassapput. Kalaallit Airports A/S taama ilisimatitsivoq.
Pilersaarutaasoq malillugu Ilulissani Nuummilu mittarfittaassat 2021-mi ammarneqartussaagaluarput, Qaqortumilu mittarfittaassaq 2020-mi. Aningaasanulli inatsisip akuersissutigineqarneratigut pilersaarutit taakku kinguartinneqarput.
Allannguutaasorlu Kalaallit Airports A/S-imit nuannaarutigineqarpoq.
AAMMA ATUARUK Mittarfiliassat aningaasanut inatsit pissutigalugu kinguartinneqartut
Kommune Kujallermi aningaasarsiortoqarpallaalernissaanut aarlerinartorsiortoqanngilaq, paarlattuanilli aningaasaliiumasut suliffissallu amigaatigineqarput, Kommune Kujallermi kommunalbestyrelsi taama allagaqarpoq.
- Saaffiginninnitta sakkortunera ajuusaarutigaarput, allatulli iliorsinnaanngilagut aningaasanut inatsit 2018-moortoq taassumalu oqaasertaliussartai misissoreerlutigit sakkortusaartariaqalerpugut tusaaneqarnissarput piumasaralugu.
Asasavut Naalakkersuisut! Qinnuigaassi Inatsisartut tunngaviusumik aalajangernerat pilersaarutaaqqaartullu ataqqeqqullugit. Nuummi sanaartortoqarpallaartoqarsinnaanissamik aarlerinartorsiulissanganeq nunatta sinneranik unittoortitsisussaanngilaq!
Kommunalbestyrelse taama ammasumik naalakkersuisunut allagaqarpoq.
Pilersaarut nutaaq malillugu illoqarfiit pineqartut pingasut mittarfittaatik aatsaat 2022-mi atoqqaarfissiorsinnaassavaat.
AAMMA ATUARUK Mittarfiit aningaasalersornissaannut inatsit tuaviiussaq
AAMMA ATUARUK Mittarfiliassat aningaasanut inatsit pissutigalugu kinguartinneqartut
