Kuannersuarnut aningaasat amerlanerusut qulakkeerneqartut

Australiamiut nittartagaat Proactiveinvestors Australia naapertorlugu aningaasaliisussat GME-mut 10,25 millionit australiamiut dollarsii tassa 48,7 millionit koruunit aningaasaliissutigaat.

42,7 millionit koruunit Hong Kongimi, Singaporemi Australiamilu aningaasaliisartuneersuupput, sinnerilu 6 millionit koruunit GME-mi piginneqataareersunit kinamiut Shenghe Resourcessimeersuupput. Taamaalilluni Shenghe Resourcesip suliffeqarfiup 12,5 procentia suli pigaa.

GME-mi pisortap John Mairip aningaasaliineq ilorrisimaarutigalugu proactiveinvestorsimut oqaatigaa, KNR-imullu mailikkut allallu itisiliivoq:

- Aningaasat suliffeqarfimmi Shenghe Resorces peqatigalugu teknikkikkut misissuinerit piareereersarneranut atorneqassapput kiisalu pilersaarummi akuersissutit kingulliit inissinnissaanut atorneqassapput, John Mair oqarpoq.

Pisortaq naapertorlugu aningaasaliisut tassaapput nunat tamalaat akornannit pinngortitamit isumalluutinut aningaasaliisartut. Ilanngullugu aamma suliffeqarfiit qaqutigoortunik piiaasut siunissagissaarsorai, tassa piiagassat qaqugutigoortut ilaatigut biilinut innaallagiatortunut, ataavartumik nukissiuteqarnermut teknologiinullu assigiinngitsunut nutaalianut pingaaruteqarmata.

Misissuinermi VVM-mik nalunaajaaneq avatangiisinut kingunissanik assigiinngitsumik naammaginartumik paasissutissiinngimmat,
GME avatangiisinut tunngatillugu allamik misissueqqeqquneqartoq, avatangiisinut aqutsisoqarfiup aviisimut AG-mut aggustip qaammataani paasissutissiissutigaa.

Piumasaqaatinut naammaginartumik VVM-mik nalunaajaasoqareerpat nalunaarusiaq pisortatigoortumik tusarniaassutigineqassaaq.