Takornariartaat Sullualukkooreerluni uterpoq
Amerikamiut umiarsuaat takornariartaassuaq inuulluataarfiusinnaasoq, Crystal Serenity, New Yorkip umiarsualivianut tallimanngormat talippoq, amerikallu imartaata avannaatigut angalanini iluatsilluartumik naammassillugu. Nittartakkatigut nutaarsiassaqarfik maritimedanmark.dk taama allappoq.
Umiarsuup 7,297 sømilimik isorartussusilimmut ulluni 32-ini angalanerani issimasut 1.000-it sinneqartut inuttallu 600-ut ilaapput.
Umiarsuaq takornariartaassuaq sapaatip akunnera kingulleq aamma Nuummiippoq.
Tuluit umiarsuaata ilisimasassarsiuutip RRS Ernest Shackletonip umiarsuaq takornariartaassuaq avannarpasinnerpaakkut angalanerani ingerlaqatigaa, umiarsuarli aqqutaani ajornartoorsimanngilaq.
Crystal Cruisesip angalaneq iluatsilluartorujussuunerarpaa, aqqullu 2017-imi angallavigeqqinniarlugu.
