VIDEO Kruse Sisimiuni pisoq pillugu: Naalakkersuisut isummernissaat utaqqisariaqarpara
Ullumikkut tunitsiveqarnermi atukkat naammaginartinneqannginnerisa kinguneraat aalisartut mattussinissamik pilersaaruteqalerneri. Maanna aalisariutit talinngaannarput, ullumilu Nunatsinni illoqarfiit annersaata tulliani aalisartut akerliussutsimik takutitsiniarlutik aaliangernikuupput.
Aamma atuaruk Sisimiuni aalisartut tunitsiviliisoqarnissaanik ilungersuuteqartut
Aalisariutit minnerit ulloq allortarlugu 400 kiilunik tunisisinnaapput, saarullillu niaquigaq kiilumut 5,50 koruunilik imminut akilersinnaanngilaq.
- Ullumikkut imaattussaagaluarpoq; saarullippassuaqarpoq, taava sisimiormiut saarullinniarratissapput periarfissaq atorlugu, Leif Fontain KNAPK-p Sisimiuni immikkoortortaqarfiani siulersuisuni ilaasortaq oqarpoq.
Aamma atuaruk Umiarsuarmik tunitsiviusinnaasumik akuersissuteqarnissaq Royal Greenlandip paasiuminaatsippaa
Unammilleqatigiinneq kissaatigineqarpoq
Umiarsuarmik tunitsiviliisoqarnissaa, unammilleqatigiittoqarnisaa malimmassaasoqarnissaalu aalisartunit kissaatigineqarpoq.
- Erseqqissumik oqassagaanni inuiaqatigiit kalaallit nunatsinni ilungersorlutik suliniaraluartut pisortaninngaanniit suusupagineqarput, Erik Kleist isumaqarpoq.
- Paasineqartariaqarpoq taanna, maani inuutissarsiornerput, taamaattoqartillugu unammillerfiusoqartinnagu qanoq ilungersunartigisoq, Ulloriaq Olsen, Royal greenlandip kisermaassinera eqqarsaatigalugu, oqarpoq.
Aamma atuaruk Sisimiuni aalisartut umiarsualivimmik assersuinissamut piareeqqapput
Naalakkersuisoq utaqqimaartoq
Aalisartulli naammagittartariaqarput Naalakkersuisullu utaqqillugit, aalisarnermut naalakkersuisoq oqarpoq.
- Kisimiillunga aaliangiisinnaatitaaffimmik peqartuuguma sukkanerusumik naammassineqarsinnaasutut isikkoqassagaluarpoq, Karl Kristian Kruse KNR-imut oqarpoq, nangillunilu;
- Kisiannili naalakkersuisut suleriaasiat malillugu naalakkersuisuni taanna isummernissaq qanoq kinguneqassanersoq pitinnagu oqareersinnaanngilanga qanoq naammassissasoq, kisianni neriuutigivara naalakkersuisut sinneraniit akuerineqarsinnaassasoq.
Sisimiuni aalisartut isumaqarput Royal Greenlandi eqqunngitsumik ingerlatsisoq. Tamannalu soraarsitsinernik kinguneqartariaqartoq.
- assersuutigisigu siorna 2014-imi ukiakkut septembarimi assagiarsuleriffiup ammaqqinnissaa neriorsuutigaat, ulloq manna tikillugu suli ammaqqinngilaq, tamannalu aalisartunut aamma sakkortuumik aningaasarsiornikut kinguariarnermik kinguneqarpoq, Leif Fontain oqarpoq.
Ullumi nalunaaqutaq ataatsimut aalisartut akerliussutsimik takutitsipput.
Aamma atuaruk VIDEO Kruse Sisimiuni saarullilerineq pillugu sulipallattoq
Aamma atuaruk VIDEO Sisimiormiut aalisartut Krusemut erseqqissimik oqariartuuteqartut
