Kruse: Qaleralittassat ikilissanngillat

Qeqertarsuup tunuani qaleralinniarnerup kinguariarfiunera peqqutigalugu nalilersuisoqaqqittariaqartoq, Naalakkersuisut siulittaasuata, Kim Kielsenip Inatsisartut ukiaannerani ataatsimiillutik aallartinneranni ammaalluni oqalugiarnermini oqaatigaa.

Taamaakkaluartorli qaleralittassiissutit ikilineqarnissaat naatsorsuutiginagu, Aalisarnermut Piniarnermullu Naalakkersuisup Karl-Kristian Krusep oqaatigaa. 

Piffissami sivitsulersumi tusagassiutitigut oqallisaasut,  tassalu qalerallit.. 

Naalakkersuisup siulittaasuat Kim Kielsen Inatsisartut oqaluttarfianni oqalugiarnermini aamma eqqaavai.  

- Aalisartorpassuit suliffeqarfiillu Qeqertarsuup Tunuani, Uummannami Upernavimmilu qaleralinniarnermik napassuteqarput. Pisariaqartinneqarpoq qaleralinnik isumalluuteqarnitta nalilersorneqqinnissaa. Qeqertarsuup tunuani qaleralinniarneq ukiunut siuliinut naleqqiullugu kinguariartoq malunnarpoq. Tamanna pissutigalugu aalisagaqarfimmi tassani aqutsinerup allanngortinnissaanut Naalakkersuisuniit siunnersuusiussaagut, Kim Kielsen ammaanermi oqalugiarnermini oqarpoq. 

Nutaamik aqutseriaaseqartoqalernissaanik Naalakkersuisup siulittaasuata oqaaserisaa, pisassiissutinik ikililerinissamik oqariartuutaanngitsoq Aalisarnermut Naalakkersuisup erseqqissarpaa. 

- Uani pisassiisarnermut tunngatillugu taanna allannguuteqassanngitsoq uanga oqariartuutigivara taamaattorli qaleralinniariaatsip ullumikkumut naleqqussarnissaanik tunngatillugu isumaqarpunga oqaloqatigiinnikkut paaseqatigiiffiusumillu sukaterisoqarnissaa taanna pineqartoq, Karl-Kristian Kruse oqarpoq. 

Pisassiissutit 

Aqutsiveqarfinni pingasuni tassalu aqutsiveqarfik Upernavik, Uummannaq kiisalu Qeqertarsuup tunuani immikkut 27.000 tonsinik qaleralittassiisoqartarpoq, naak bioluuginit 19.200 tonsit innersuussutigineqaraluartut. 

Aalisarnermut Naalakkersuisup bioluugit innersuussutaat malinneqassanngitsut siusinnerusukkulli oqaatigisarpaa. 

Qaleralittassiissutissat ikiliniarneqassappata, qanoq isummernissaa pillugu aperiganni ima akivoq. 

- Soorunami taama isikkulinnik oqallittoqassappat oqaloqataaffigissuara kisianni naatsorsuutigaara aaliangiusimasakka taakku illersorumaarlugit, Karl Kristian Kruse oqarpoq. 

Kim Kielsen oqassagaluarpat bioluugit innersuussutaat malissavarput?

- Naatsorsuutiginngilara Naalakkersuinikkut tamakkiisumik malinneqarsinnaanersoq.

KNR-imit Kim Kielsen tamatuma kingorna oqaloqatigaarput, taassuma aalisarnermut naalakkersuisoq, Karl-Kristian Kruse aalisarnermut naleqqussaasoqarnissamut maanna akisussaalernerarpaa. Imaanngilarli pisassiissutinik annikilliisoqassasoq, Kielsen oqarpoq.

Naqqiissuut: Pisassiissutit sumiiffinni pingasuni katillugit 9200 tonsiusut uumassusilerisullu 8000 tonsit kisiisa pisassiissutigeqqugaluaraat siusinnerusukkut allassimagaluarparput. Tamannali eqqortuunngilaq. Kisitsisit eqqortut ilanngutassiami allassimapput.

Isummersuutit

inatsisartut_forarssamling_2017_nils_baum_bureau_for_inatsisartut.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!