Krusep nalunaaruteqarnera WWF-ip iluaraa
Ilisimasakippallaarneq tunngavigalugu Qaanaami aalisarnerup sukkavallaamik ingerlanneqarnissaani WWF Verdensnaturfondenip mianersoqqusilluni uparuaaneranut aalisarnermut naalakkersuisup akissuteqarneranut maanna WWF Verdensnaturfond akissuteqarpoq.
Akissuteqaalli aalisarnermut naalakkersuisup Karl-Kristian Krusep annertuuliuutiginngilaa.
Aamma atuaruk Uumassusilerisup ingerlatsivimmik pilersitsisoqarnissaa siunnersuutigaa
Qaanaap imartai misissoqqissaarneqassasut, ilaatigullu Pinngortitaleriffik peqatigalugu misileraalluni aalisarnermik ingerlatsivigineqassasut erseqqissaassutigalugu. Tamannalu Verdensnaturfondenip nuannaarutigaa.Tassa WWF-ip kissaatigisarpiaa, WWF-ip Nuummi suliniutinut ataqatigiissaarisua Kaare Winther Hansen tusagassiutinut nalunaaruteqarnermi allappoq.
Aamma atuaruk Krusep WWF isumaqatiginngilaa
Isumaqatigiinnerli tassani kipivoq. Qaleralinnik tunisinerup ukiuni kingullerni pingasoriaammik annertusisimanerata Qaanaap imartaani qalerallit nungutaalinnginnerannut takussutissaasoq Karl-Kristian Krusep tunngavilersuinera WWF-imit tupigusuutigineqarpoq.
- Imartani pineqartuni suli misissuisoqarsimannginnera tunngavigalugu, aalisarnerlu imaaliinnarlugu annertusineqarnera aallaavigalugu, uumasut nungutaariaannaaneri mattunneqarsinnaasorinanngilaq, Verdensnaturfonden tunngavilersuinermini naqissusiivoq.