Kruse aalajangerpoq: Aapaagumut raajattassiissutit qaffanneqarput

Naalakkersuisut Kitaani aapaagumut raajartassanik amerlassusiliinertik ippassaq saqqummiuppaat. Raajartassat ukioq manna 73.000 tonsiusut aappaagu 85.000 tonsinut Naalakkersuisut qaffappaat.

Allattoq Paarnaq Hansen

novembarip 25-at 2015 11:50

Tassalu Pinngortitaleriffimmiit aapppaagumut inassutigineqartunit ikinnernik pisassiipput.

- Taannalu aallaavigalugu naalakkersuisuni sulisimavugut inuutissarsiortut peqatigalugit inissiiniarnermut tungatillugu aappaagumut raajartassiissutit pillugit. Taavalu isumaqatigiiffiusumik inissipparput 14,6 procentimit qaffaasoqassasoq tassa imaappoq 85.000 tonsit 2016-mi raajattassiissutigineqarput, taamalilluni aamma ukiuni tulliini qaffaasinnaanermut periarfissalittut isikkulerlugu inissinneqarput, aalisarnermut naalakkarsuisoq Karl-Kristian Kruse oqarpoq.

Aamma atuaruk Raajat 90.000 tonsit 2016-imi aalisarneqassasut inassutaavoq

Aamma atuaruk Biologit innersuussutaat sipporneqassanngillat

Biologit innersuussutaasa qaffanneri malitsigalugit ukiuni tulliuttuni raajattassiisutit amerlineqarnissaat aalisarnermut naalakkersuisup neriuutigaa.

- 2016-mi ingerlaaserput takoriarlugu, taava periarfissaqarpoq ukiup tulliani aamma qaffaasoqarsinnaaneranik soorlu innersuussutigineqartut naak ataallugu pisassiinitta taanna takutippaa ukiuni tullerni periarfissaqarpoq qaffaasoqarsinnaaneranut, aalisarnermut naalakkersuisoq Karl-Kristian Kruse taama oqarpoq.

Aamma atuaruk Raajartassat amerlanerunissaat KNAPK-mit kissaatigineqarpoq