Korea avannarlermut killilersuinerit sakkortusaqqikkaat
Nunat assigiinngitsut nutaarsiassaqartitsivii taama allaaserisaqarput.
Korea Avannarleq pillugu aalajangersagaq USA-mit siunnersuutigineqartoq Isumannaallisaaniaqatigiinni ilaasortanit tamanit tapersersorneqarpoq.
- Korea Avannarleq aatsaat taama sakkortutigisumik iliuuseqarfigineqarpoq, USA-p Naalagaafffiit Peqatigiinnut aallartitaa Nikki Haley oqarpoq.
- Korea Avannarliulli iliuuseqarfigineqarnissaanut aalajangersagaq nunanit tamalaanit malinneqarpat aatsaat sunniuteqarsinnaasoq nalunngilarput, Haley ilanngullugu oqarpoq.
USA-p Korea Avannarlermut sakkulersorusunnginnera taassuma erseqqissaatigaa, akerlianillu oqaatigalugu Pyongyangimi aqutsisut oqaloqatigineqarsinnaanissaat suli periarfissaasoq.
Oqaloqatigineqassappatali Korea Avannarliup atomimik qaartartorsuarmik ineriartortitsinera unitsinneqaqqaartariaqartoq erseqqissaatigaa.
/Ritzau/
