FN-imut aallartitaq: Korea avannarleq sorsuttoqalissappat suujunnaarsinneqassaaq

- Sorsuttoqalissappat Korea avannarlermi naalakkersuisut suujunnaarsinneqarnissaat qularutigineqassanngilaq, USA-p Naalagaaffiit Peqatigiinnut aallartitaa, Nikki Haley, Reuters naapertorlugu taama oqarpoq.

Korea avannarlermi naalakkersuisut rakettimik ungasissumut ingerlaarsinnaasumik pingasunngormat igeriussinerisa kingorna taama nalunaaruteqarpoq.

Korea avannarlermi naalakkersuisut igeriussinermik kingorna ilisimatitsissutigaat Amerikap nunavittaa rakettinik angusinnaanngorsimallugu maannalu atomimik sakkussiaateqarluni pissaanilissuartut imminut isigilerluni.

- Korea avannarlermi kisermaassisup atomimik sakkussianut tiguartisimanerata sakkortusiartuinnarnera qularutissaanngilaq, Nikki Haley taama oqarpoq.

Akerleriinnerlu sorsuttoqalerneranik kinguneqassagaluarpat, tamanna Korea avannarliup uteqqiattumik peqqusaarnerata kinngunerissagaa oqaatigaa.

Taamaammat USA-p silarsuarmi nunat tamarluinnaasa kajumissaarpai naalakkersuisunikkut aningaasatigullu Korea avannarlermut atassuteqaatit unitsinneqassasut.

    /ritzau/

    /ritzau/