Korea avannarleq Japan qulaallugu rakettimik igeriusseqqittoq
Korea avannarliup sakkussiaminik misileraanini ingerlatiinnarpaa, naak taamaaliornera nunanit tamalaanit sukannersumik unitseqquneqaraluartoq.
Korea avannarlermi siuttut tallimanngornermi ullaaralaakkut rakettimik igeriusseqqipput. Tamatumuuna illoqarfiit pingaarnersaannit Pyongyangimit. Raketti kangimut igeriunneqarpoq Manerassuarmullu nakkannginnermini Japanimi qeqertaq Hokkaido qulaappaa.
Nutaarsiassaqartitsivik AFP taama allaaserisaqarpoq.
Naalagaaffiit Peqatigiit Sillimaniarnermut siunnersuisoqatigiivi Korea avannarlermut killilersuinernik nutaanik sapaatit-akunneranni uani aalajangersaareersut rakettimik misileraaneq pivoq. Korea avannarliup atomimik qaartartuliamik misileraanerata kinguninngua taamaaliorput.
Rakettimillu misileraaneq ullumi pisoq pissutigalugu, Naalagaaffiit Peqatigiit Sillimaniarnermut siunnersuisoqatigiivi ullumi tallimanngornermi ualikkut pisussamik ataatsimiigiartitsigasuarput.
Rakettimillu igeriussisoqarsimanera amerikamiut sakkutuuisa Manerassuarmi immikkut suliassitat uppernarsarpaat.
Tamatumunngalu peqatigitillugu sakkutuut immikkut suliassitat erseqqissaatigaat raketti pineqartoq Amerikap nunavittaanut anngussinnaanera aarlerinaateqanngitsoq. Raketti aamma Amerikap Manerassuarmi qeqertaataanut Guaminut aarlerinaateqanngilaq.
Korea avannarliup USA-mut assortuussuteqarnermini Guamip rakettinik saassunnissaanik sioorasaaruteqartarsimavoq.
Korea kujallermi illersornissamut ministereqarfik naapertorlugu raketti kilometerit 3700-it missaannik ingerlaarpoq kilometerinillu 770-inik qutsitsigisukkoorluni.
Raketti nal. 06.57 igeriunneqarsimasoq Japanimi tv-qarfiup NHK-ip ilisimatitsissutigaa.
Japanimi naalakkersuisut oqaaseqartuata Yoshihide Sugap oqaatigaa innuttaasut illersorniarlugit nunami qanoq iliornissamut piareersaatit tamaasa aallartisarneqartut.
Tamannalu Korea kujalleq USA-lu suleqatigalugit pissaaq.
Oqaaseqartartoq naapertorlugu raketti qeqertap Cape Erimop kangiani kilometerit 2000-it missaannik ungasitsigisumi imaanut nakkarpoq.
Raketti sapaatit-akunneri marluk matuma siorna misilinneqartumit qutsinnerusukkoorlunilu isorartunerusumut igeriunneqarpoq.
USA-p præsidentia, Donald Trump, rakettimik igeriussineq pillugu ilisimatinneqareersimavoq.
Præsidentip Illorsuata oqaaseqartartua Huckabee Sanders, Reuters naapertorlugu, taama ilisimatitsivoq.
- Korea avannarliup rakettimik misiliinera kingulleq pillugu general Kellyimit ilisimatinneqarpoq, oqaaseqartartoq Præsidentip illorsuani atorfillit qullersaat John. F. Kelly innersuussutigalugu taama oqarpoq.
Korea avannarliup rakettimik misiliinera pivoq, Korea avannarliup Japanip "kisivisinnissaanik" USA-llu "arsakuinnanngortillugulu taartuinnanngortinnissaanik" sioorasaaruteqareersoq.
Korea avannarliup Japan qulaallugu rakettimik igeriussinera kingulleq sapaatit-akunneri marluk matuma siorna pivoq.
/ritzau/
