Kommunit juulli sioqqullugu akissarsisitsiniarput

Pisortani sulisut juulli sioqqullugu ukiuni qulikkaani arlalinni akissarsitinneqartarnerat ileqquusimagaluariarluni, tamanna maanna unitsinneqassasoq, Aningaasaqarnermut naalakkersuisup Maliina Abelsenip siorna nalunaarutigaa.

- Decembari qaammat aningaasarsialerivimmut ulapiffiunerpaasarpoq, tassa ukiup naanera tassani pissutaavoq. Ilutigalugu qaammammusialinnut juullertinnagu aningaasarsisitsisarnerup kinguneranik piffissap nalinginnaasup 2/3-a aningaasarsiassanik tunniussiviusarpoq. Tamatuma kinguneranik tarnikkut peqqinnartumik sulisarneq artukkerneqartarpoq kiisalu qaangiuttoortarneq paarlattaasussanillu atuinissaq pisariaqartinneqalertarluni. Aningaasarsisarnerup nalinginnaasunngortinneqarneratigut ajoqutaasartut aningaasartuutaasartullu pisariaqartinneqanngitsut taakkua pinngitsoortinneqassapput, Kristian Jeremiassenip Siumumeersup paragraf 37 naapertorlugu apeqqutaanut naalakkersuisoq Maliina Abelsen siorna ilaatigut taama akivoq.

Decembarimili akissarsiat juulli sioqqullugu kingullerpaamik tunniunneqassasut, siunissamilu decembarip naanerani tunniunneqartalissasut, Maliina Abelsenip taamanikkut erseqqissaatigaa.

Naallu kommunit isumaqatigiinniarnerni Namminersorlutik Oqartussat illuatungerinagit akerlianik suleqatigisaraluaraat, kommunit sulisutik ukioq manna Juullertinnagu akissarsiaqartinniarpaat.

- Kommunit tamanna pillugu siorna oqallipput, siunnersuullu tapersinnginnamikku Juulli sioqqullugu akissarsisitsisarnerup taama iluseqartillugu attanneqarnissaa siunniuppaat, Kommuneqarfik Sermersuumi pisortaaneq Søren Hald Møller oqarpoq.

Kommune Kujallermiillu isummat saqqummiunneqartut allaanerungaanngillat:

- Apeqqut taanna Aningaasaqarnermut ataatsimiititaliatsinnut saqqummiussimavarput, aammalu taassuma akuerivaa juullertinnagu akissarsisitsisinnaasugut, Kommune Kujallermi pisortaaneq Jørgen Vetterlain oqarpoq.

Qeqqata Kommuniani sulisut juullertinnagu akissarsitinneqartarnerat ileqquummat tamanna attanniaritsik, Qeqqata Kommuniata pisortaanerata Paneeraq Olsenip oqaatigaa, juullertinnagulu akissarsisitsinnginnissamik Namminersorlutik Oqartussanit peqquneqarsimannginnertik erseqqissaatigalugu.

Qaasuitsup Kommunia oqaaseqartinniaraluaratsigu iluatsinngilarput, kommunilli nittartagaani takuneqarsinnaavoq sulisut decembarip 20-anni akissarsitinneqarnissaat pilersaarutaasoq.

Aningaasaqarnermut naalakkersuisoq Maliina Abelsen oqaaseqartinniaraluaratsigu aamma iluatsinngilarput.