Kommunit ikiuuteqqullugit kaammattorneqarput

Nunatsinni kommuneqarfiit kattuffiat sinerissami kommuneqarfinnut tamanut maanna kajumissaaruteqarpoq Asiami ajunaarnersuarmit eqqugaasunut katersuiniarnernut tapersersueqqusilluni.

- Asiami nunani arlaqartuni innuttaasut juullikkunni ajunaarnersuarmit eqqugaanerat tamatta annilaarutigeqisatsinnik tusarparput.

Uagut nunatsinni innuttaasugut, ajunaarnermit eqqugaasut toqqaannartumik ikiorsinnaangikkaluarpagut, kisianni ikiuiniaqatigiiffiit nunani eqqugaasuni sulisut ikiorniarlugit ikiorseeqataasinnaavugut, Jens Lars Fleischer Kanukokap siulittaasua, borgmesterinut tamanut allakkamini taama allagaqarpoq.

Ilanngullugu allappoq kommunini sunngiffimmik sammisassaqartitsisuusut siornagut katersuiniartarnerit aqqutigalugit misilittagaqarluareermata, neriuutigigini katersuiniarluni massakkut suliniutit kommuninit suleqataaffigineqarluarumaartut.

Kommuneqarfinnit ajunaarnersuarmut maannamut ikiorsiissuteqareersut tassaapput Qeqertarsuup kommunea, 10.000 koruuninik tunniussaqartoq, kiisalu Kangaatsiap kommunea 30.000 koruuninik ikiuiniarnermi atugassanik tunniussaqartoq.