Kommunit ikinnerusunik aappaagu aningaasaliiffigineqassapput
KANUKOKA aningaasaqarnermullu naalakkersuisoq kommuninut aappaagumut tapiissutissat aasaq isumaqatigiissutigisimagaat ippassaq ullo’qeqqanut radioaviisimi oqaluttuaraarput. Aasaq isumaqatigiissummut ilanngunneqarpoq aappaagumut aningaasanut inatsisissap inatsisartuni akuerineqariarpat isumaqatigiissummut ilassutissamik atsioqatigeeqqittoqarumaartoq.
Kommuninut tapiissutissat pillugit isumaqatigiissummut ilassutissamik isumaqatigiittoqarpoq. Aningaasaqarnermut naalakkersuisoq Josef Motzfeldt aamma KANUKOKAp siulittaasua Jens Lars Fleischer ilassutissaq sisamangormat atsiorpaat.
Isumaqatigiissummut ilassutissami kommuninut tapit ikileriaateqassapput, kommuninulli artukkersuutaanavianngitsut, Jens Lars fleischer erseqqissaassutigaa.
Aningaasanut inatsisissap suli inatsisartuni akuerineqanngitsup ataaniittut isumaginninnermut aningaasartuutit kiisalu akit assigiikkunnaarnissaannut allannguutissat naatsorsuutigereerlugit ilassummik isumaqatigiissusiortoqarpoq.
Kommunit aappaagu 2 milliuuni koruningajannik ikinnerusunik taperneqassapput, kommuninut tapiissutissat katillugit 796 milliuuni koruuniussapput.
