Kommunip avinneqarnissaa arlaannaataluunniit akilerumanngikkaa
Qaasuitsup Kommunia avinneqassappat, tamanna piffissaq qaninnerusoq ungasinnerusorlu eqqarsaatigalugit millionerpassuarnik akeqartussaassaaq. Tamatumunngali arlaannaalluunniit akileerusunngilaq. Aviisi Sermitsiaq taama allaaserisaqarpoq.
Paasissutissat
Qaasuitsup Kommuniata avinneqarnera allaffissornikkut politikkikkullu aqutsinikku 9,4 millionit koruunit 20,9 millionit koruunillu akornanni aningaasartuuteqarfiunerulersitsissaaq, siunnersuisarfiup kukkunersiuisarfiullu BDO-p nalunaarusiaani tamanna atuarneqarsinnavoq.
Akileraarutinillu isertitanut naatsorsuukkaanni, kommunit nutaanngorumaartussat innuttaasumit ataatsimit 5.276 koruunit 6.443 koruunillu akornanni akileraartitsinerusariaqassapput.
Siunnersuisarfiup kukkunersiuisarfiullu BDO-p nalunaarusiaa naapertorlugu, kommunip avinneqarnera ikinnerpaamik 15,8 millionit koruuninik akeqassaaq, tamatumalu saniatigut ukiumut 10 millionit koruunit missaannik aningaasartuuteqarfiunerunissaa naatsorsuutigineqarpoq.
Qaasuitsup Kommuniatali avinneqarneratigut allaffissornerulernissamut aningaasartuutit matussuserniarlugit tapiissutit pisartakkamik ikilisinneqarnissaat akueriumanagu kommunit sinneri pingasuusut erseqqissaatigaat.
Aamma atuaruk Nalunaarusiaq: Kommunip avinnissaa akisussaaq
Qaasuitsup Kommuniata, kommunip avinneqarnissaanik kissaateqartup, aningaasartuutissat aamma akilerumanngilai. Borgmester Ole Dorphip Sermitsiamut oqaatigaa kommuninik aaqqissuusseqqinneq kukkussutaasimasutut isigalugu. Kukkunerlu taanna Inatsisartuni pisimavoq, taamaammat isumaqarpoq Naalakkersuisut akiliisariaqartut.
Aningaasaqarnermut naalakkersuisoqarfiup tusarniaanermi akissutimini aamma erseqqissaatigaa kommuninut ilassutaasussamut aningaasassarsiornissamik eqqarsaateqarani.
- Naalakkersuisoqarfimmi iluarisimaarneqarpoq inatsisissatut siunnersuummi avinnissamut aningaasartuutit tamarmik maannakkut Qaasuitsup Kommunianiimmata kingornalu kommunini nutaani marlunni, taamaalilluni avinneq inuiaqatigiit sinnerinut nanertuutaanani, aviisi Sermitsiaq taama allaaserisaqarpoq.
