NALILIINEQ Kommuninik aaqqissuusseqqinnissaq Siumup kisermaappaa

Siumumiit qinersinissap tungaanut neriorsuutit ilagaat Qaasuitsup kommuuniata avinneqarnissaa. Taamaattumik ilimanarsinnaavoq kommuninik aaqqissuusseqqinnissaq maanna Naalakkersuisunngortussat isumaqatigiinniarneranni tunngavigineqarsinnaasut ilaat.
decembarip 03-at 2014 15:38

- Qaasuitsup Kommunia kommuninut marlunnut imaluunniit pingasunut avinneqassaaq.

Oktobarip 23-ani Siumup qinersinissamut pilersaarutertik saqqummiummassuk Vittus Qujaikitsoq taama oqarpoq. Pilersaarummilu qupperneq 10 aamma 11-mi atuarneqarsinnaavoq avannaani kommunit pingasunngussanersut imaluunniit tunumi illoqarfiit Kommuneqarfik Sermersuumiit avissaartinneqassanersut. Tassa kommunit rådhusiinik marloriaatinngortitsisoqarluni.

 

Kommunit aaqqissuussaanerata kingunerisaasa naliliineqarnerat Naalakkersuisut utaqqigaluaraat, utaqqinermi aalajangiisuussaaq avissaartuussinissaq pilersinneqassanersoq. Siumut kikkut Naalakkersuisooqatigilernerai apeqqutaasussaammat.

 

Partiit akerliusut
Partii Naleraq aallartissutigeriartigu, siulittaasuata Hans Enoksenip 2009-mi siuttuulluni nammineq kommunerisaminut iluaqutaaqisumik kommuninik aaqqissuusseqqinneq naammassivaa. Qeqqata Kommunia kommuninit allanit ingerlalluarnerpaatut erserpoq kommunit sinnerini isorliunerusuneersut oqartussaaqataaneq amigaatiginerarlugu maalaartarnerat atugarineqanngimmat. Taamaattumik Partii Naleqqami siulittaasup kommunini politikkikkut nunap assinganik nutaamik suliaqaqqinnissaa ilimananngilaq, Partiimi qinersisartut nunaaqarfinneersut isumaqataanngitsut arlaqarsinnaagaluartut.

 

Siusinnerusukkut kommunit avinneqarnissaat sammineranni tunup kitaaniit avissaartinneqarnissaa pillugu atsiornernik katersisoqarmat, Demokratineersoq Justus Hansen akerliusunut ilaavoq, maannakkut inissisimaneq Tasiilarmiunut iluaqutaanerusoq nalileramiuk.

 

Taamaattumik avissaarnissamik pilersaaruteqarnissaq Demokratinit tapersersorneqanngitsoq ilimagisinnaavarput, avissaartoqarnissaami Nunatta karsiata ajornartorsiorfiani aningaasanik amerlanernik malitseqartussaasoq ilimagigamikku.

 

Atassutikkut piumasaqaateqanngillat
Illuatungaanili tunumi Atassut qinerluarneqarpoq, Mala Høy Kuko immikkuullarissumik tasiilami qinerneqarnerpaalluni. Qinersisinit 2000 missaanniittunit 300 sinnilaarlugit qinersisigai. Taamaakkaluartoq Naalakkersuisunngornissamut isumaqatigiinniarnermi immikkut ittumik Siumukkunnut piumasaqaateqarani KNR-mut oqaatigaa.

 

Siumut kisiartaallutik kommunit aaqqissuuteqqinnissaat suliassatut ingerlatissagunarpaat. Naalakkersuinikkut isumaqatigiissummi Kommunit marluk pingasulluunniit nutaat pilersaarutaanersut apeqqutaasorujussuussaaq, isumaqatiginninniartup angujumasarpassuisa ilaat piviusunngortinnissaanut qanoq piumasaqartiginersoq apeqqutaalermat.

 

2009-mi Kommunit kattussuunnerisa kingunerisaasa nalilersorneqarnerat ukiup affaata ingerlanerani piareerneqassasoq ilimagineqarpoq.