Kommuneqarfik Sermersuumi pisortaanerup paasissutissiinerlussimanini ajuusaarutigaa
Tamannalu eqqortuunngitsoq Nuuk-TV-p aallakaatitassiaminni januaarip tallimaanni oqaatigaat. Paasinarsivormi pequtit akisunerungaatsiartut, tassalu aningaasat 1,7 millionit koruunit nutaanik allaffeqarfiliornermut atorneqarsimammata.
- Uppernarsarsinnaavara pequtinik pisineq 1,7 millionit koruuninik akeqarmat. Taamaattumik, decembarip qulinganni allatut oqaaseqarsimanera ajuusaarutigaara. Kukkusumik paasissutissiinissaq siunertarisimanngilluinnarpara. Kukkusumik paasissutissiinerit kommunip iluani ajuusaarnartumik kukkusoqarneranik peqquteqarput, siunissamilu taamatut pisoqaqqinnginnissaa anguniarlugu pitsaanerpaamik iliuuseqarniarpugut, Steffen Ulrich-Lynge tusagassiutinut nalunaarummini taama allappoq.
Taakku aningaasat kommuneqarfik Sermersuup Suliffeqarnermut Inuussutissarsiornermullu Ingerlatsivianut, 70-it missaannik sulisulimmi, nutaanik allaffeqarfiliornermut atatillugu, 2014-imi upernaakkut atorneqarput.