Kommunefogedit sakkussaqarnerulerput

Kommunefogedit politiinut ikiortitut suliaat oqitsuinnaanngillat, ikiueqqaarnissamulli pikkorissarnerit, imminullu toqunniartunik sioorasaarisunik oqaloqateqarsinnaaneq, ataatassarsiuussinernilu suleriaatsit pikkorissarfigereerlugit suliamut kiserliornarsinnaasumut sakkussaqalerput.
Rigspolitiet
Assi © : Rigspolitiet
Allattoq Bibi Nathansen
novembarip 25-at 2016 10:27

Kommunefogedit maanna pikkorissarneqaleruttorput.

- Soorlu pinerluttoqarsimappat, tassunga tunngassuteqartunut paasiniaanerit aammalu uppernarsaatissanik assigiingittunik katersisinnaanerit, aammalu inunnik pinerlussimasunik tigusarinninnissinnaaneq. Taakkua inatsisitigut malersorneqarsinnaanissaat anguniarlugu suleriaaseqartussaapput, politikommissæriugallartoq Peter Grønvold KNR-imut oqarpoq. 

Taassuma aamma oqaatigaa, pikkorissarnerup siunertaasa ilagigaat kommunefogedit sulinermi inatsisit atuuttut ilisimallualernissaat, pisoqartillugu inatsisit tunngavigalugit namminneerlutik iliuuseqarsinnaalerniassammata.

Kommunefogedimmi politiinut ikiortaapput, tamannalu politeeqarfimmut qaninnermut pisussaassuseqartitsivoq, nunaqarfimmimi kommunefogediusut ullut tamaviisa attavigisassallugit ukiullu tamaasa pisinnaasaat nalilersortassallugit, pisariaqarpallu pikkorissarnissaat isumagalugit

2012-imi kommunefogedit akissarsiaat qaffanneqarput, taamali atorfinitsitsinissaq ajornarnerulersimanngilaq. 

Kommunefogeditummi atorfeqarniaraanni pillagaasimanngitsutut allagartaqartariaqarpoq, kisianni aamma:

- Nunaqarfinni, inukitsunnguusartuni ilaatigut, imminnut ilisimasaqatigiinneq annertoorujussuuvoq, taavalu arlaatigut pisoqarsimatillugu kommunefoged aamma taakkununnga ilaatigut immaqa peqataangajalluni qanitsuaraasarsinnaanera ajornartorsiuteqarnermik kommunefogedinngorusuttut piumanngittarnerinik aamma pissutaaqataasarpoq,

Peter Grønvold taama oqarpoq.

Nunaqarfinnit 68-iusunit nunaqarfiit 15-it kommunefogedeqanngillat.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk