Kommunefogedit amigaataanerat nunaqarfimmiunut toqqissisimananngitsoq
Kangaamiuni tamanna ilisimalluarpaat. Innuttaasut kommunefogediorusuttut amerlanerusut pisariaqartinneqarput.
Nunaqarfimmi ukiuni kingullerni tallimani kommunefogedeqarsimanngilaq, tamannalu pitsaanerpaaffissaaniit ungasingaatsiarpoq. Nunaqarfiup siulittaasua, Barnabas Larsen (S) oqarpoq.
- Eqqissisimananngilaq, pisariaqartinneqartarneralli qujanartumik qaqutigoorpoq. Saaffissaqannginnerli eqqissisimanarpallaanngitsoq, Barnabas Larsen oqarpoq.
Taakku paasissutissanik politiinut ingerlatitseqqissinnaapput, eqqissiviilliortitsisoqarnerani pisunilu sakkortunerusuni tigusarinnissinnaallutik.
Kangaamiuni innuttaasut 300-t missaanniimmata kommunefogedit marluusariaqaraluarput.
- Maniitsumi politiinut sianinngikkaanni saaffissaaleqinarpoq. Maniitsorlu ungasippoq taamaammat takkunniartarnerat sivisusinnaasarpoq. Tamannalu eqqissisimananngilaq, Barnabas Larsen oqarpoq.
Politiit kommunefogedinngortitsiniarnissamut piareertut
Politiit kommunefogedissarsiniarlutik nutaamik kommunefogedissarsiornermik aallartitseqqammerput. Politiit Nunatsinni nunaqarfinnut assigiinngitsunut Kangaatsiamullu ukiuni tulliuttuni pingasuni angalassapput, kommunefogedimullu atuuffik pillugu saqqummiisassallutik.
Kommunefogedit inuiaqatigiinni pingaaruteqartut politimesterip, Bjørn Tegner Bayip erseqqissaatigaa.
- Kalaallit Nunaata Politiivini pikkorissorsuarnik isumannaannermik toqqissisimanermillu pilersitsisartunik kommunefogedeqarpugut.
Nuup eqqaaniittoq Kapisillit nunaqarfinni politiinit tikinneqartussani siulliussaaq.
