VIDEO Kommunefogedeqarniarneq peqqinnissaqarfimmut sunniisarpoq
Akunnaami Aasiaat ungasinngisaani ukiut pingasut tungaanut kommunefogedeqanngilaq. Innuttaasunuinnaanngitsorli tamanna sunniuteqarpoq.
- Atorfissaqartitseriataartarnermut taavalu aamma pinartoqariasaarnermi aamma pinngittoorani kommunefoged saaffigineqartartussaangami, arlaatigut nuanninngittunik iliuuseqartoqartillugu, Grethe Olsen Akunnaami nunaqarfimmi sullissisoq KNR-imut oqarpoq.
Aamma atuaruk VIDEO Nunaqarfinni kommunefogedeqarniarneq ajornartorsiutaavoq
Nunaqarfinnimi peqqinnissaqarfinni sulisut atugaat allaanerujussuupput.
- Portøreqanngilaq, kisianni imaattoqartillugu allatut ajornartumik innuttaasut tamarmik ikiuussinnaasut ikiuuttarput, Grethe Olsen oqarpoq.
Peqqinnissaqarfimmiut politiillu illoqarfinni suleqatigiittarnerat naliginnaasuuvoq. Nunaqarfinnili kommunefogedeqanngitsuni sulilluni kiserliornarsinnaasarpoq. Politiillu, matumani Aasianni politiit, ajortoqarnerani utaqqineqartarput.
Aamma atuaruk Kommunefogedinut atugassarititaasut pitsanngorsarneqartut
Kommunefogedeqarnermulli tunngasut politiiniit pimoorunnerunerusariaqarneri Grethe Olsenip ujartorpaa.
- Arriippallaartutut isigaara aamma. Taanna sukkanerulaartumik ingerlanissaa kissaatiginartorujuugaluarpoq, Akunnaami sullissisoq oqarpoq.
Grethe Olsen Aasianni politiinut kommunefogedimik atorfinittoqarnissaanut tuavisaarilluni saaffiginnittaraluarpoq, piukkunnartunillu innersuussisaraluarluni.
- Oqaatigineqartarpoq inuttassarsiuussigaluarnerni iluatsittoqarneq ajortoq, Grethe Olsen oqarpoq.
Aamma atuaruk Kommunefogedessarsiorneq sukanniarpaat
Kommunefogedeqarniarnerlu ajornartorsiutaammat iliuutsit allanngortinneqartariaqarsorai.
- Aamma innuttaaqataagatta illoqarfittuulli nunaqarfiit taamatut qaammarsaaneq politiit nunaqarfiliartillugit suliariniarsilluk. Kajuminnarnerussooq taamannak atorfinitsinniarnissai, Grethe Olsen naggasiivoq.