Kommune Qeqertallip KANUKOKA qularigaa

Kommune Qeqertalinngortussarmi kattuffimmut ilaasortanngussanersoq nalunarpoq. Sermitsiaq ullumi tallimanngornermi taama allaaserisaqarpoq.

Kommune Qeqertalimmi ikaarsariarnermut ataatsimiititaliap siulittaasua Ane Hansen utaqqeqqaarusuppoq kommunillu KANUKOKA-mut ilaasortanngussaguni ilaasortaanermut akiliutini pissarsiaqaatigissanerlugit apeqquserpaa.

Tamanna ilaatigut kommunit kattuffiata allattoqarfimminik Nuummit Maniitsumut nuussisimaneranik pissuteqarpoq.

- Allattoqarfik illoqarfimmi kommunit isumaqatigiinniarnermi illuatungerisaata, pingaartumik Namminersorlutik Oqartussat, inissisimaffigisaanniittariaqarpoq, Ane Hansen Sermitsiamut taama oqarpoq.

Kommunit Qaqortumi isumasioqatigiinnerat naleqquttumik qulequtaqartinneqarpoq "Kommunit KANUKOKA-llu siunissaat", aamma kommuninut, nunaqarfinnut isorliunerusunullu naalakkersuisoq, Erik Jensen, peqataavoq.