Napparsimakulasarneq kommunip aamma akisussaaffigaa

Soorunamilu sulisut namminneq suliartornissartik akisussaaffigigaluaraat, aqutsinermi akisussaasoqartoq kommunip nassuerutigaa.

- Suliassatsinnik kivitsisinnaanerput aqutsisutut akisussaanerput qularutissaanngilaq. Aqutsisutullu akisussaaffik taanna tiguarput, napparsimakularsarnerlu pissutigalugu sulinngitsoortarnerit ikilisinniarlugit sulissuteqaqaagut, Kommuneqarfik Sermersuumi Isumaginninnermut, Suliffeqarnermut Inuussutissarsiornermullu ingerlatsivimmi pisortaq Grethe Nielsen KNR-imut oqarpoq.

Napparsimakulasartut oqaloqatigineqassasut pikkorissartinneqassasullu taassuma oqaatigaa.

Aamma atuaruk Napparsimakulasarnerit pissutigalugit Steffenip anaanami nangia taarsertariaqartaraa

Ajornartorsiullu ammasumik oqaloqatigiissutigineqarnissaa pingaaruteqartuussoq Grethe Nielsenittaaq isumaqarpoq.

- Una ajornartorsiut ammasumik oqaloqatigiissutigisariaqarparput, tassami suleqatitut suleqativut oqarfigisinnaasariaqarpavut suliffimmik paarsisinnaanerat naatsorsuutigalugu, sulinngitsoornikulanerlu suleqatinut allanut qanoq kinguneqarsinnaaneranik oqarsinnaasariaqarluta, Grethe Nielsen oqarpoq.

Kommuneqarfik Sermersuumi utoqqarnik sullissinermi sulisut akornanni napparsimasarnerit ajornartorsiutaapput. 

Unammilligassallu imaannanngillat, kommunimmi namminneq nalunaarusiaat naapertorlugu utoqqarnik sullissinermi sulisut akornanni agguaqatigiisillugu sulisut qulit ullut tamaasa napparsimasarput, akissarsiffimmilu agguaqatigiisillugu sulisut 25-t napparsimasarlutik.

Allatut oqaatigalugu tamanna isumaqarpoq Nuummi paaqqutarinniffiusut anginerit ilaanni atorfiit qulingiluat ullut tamaasa amigaatigineqartartut.

Pisortarli naapertorlugu suliffissaaleqisoqannginnera sulinngitsuukulasarnermut peqqutaaqataavoq.

- Suliffissaaleqisorpassuaqanngilaq, taamaammallu sulinngitsoortoqaraangat suliffimmik nangitsiinnarsinnaasunik peqanngilagut, Grethe Nielsen oqarpoq.

Tamannalu aalaakaasumik suliartortartunut suliassaqarnerulersitsiinnarnani napparsimakulasunut kinguneqarpoq.

- Aalaakkaasumik sulisutsinnut napparsimakulaneq kinguneqartariaqarsorineqarpoq. Kinguneqartarpormi, aamma sulisugut napparsimakulasut soraarsittarpavut, pisortaq Grethe Nielsen oqarpoq.