Kommune Kujallermi pisortaaneq suliunnaarsitaasoq
Kommune Kujallermi borgmesteri Kiista P. Isaksen Aningaasaqarnermut Ataatsimiititaliamik paaseqatiginnereerluni ullumi aalajangerpoq kommunimi pisortaaneq sulisussaatitaajunnaartinneqarallassasoq. Kommune Kujalleq tusagassiuutinut taama allappoq.
Tassunga ilutigitillugu kommunip pisortaanerata tullersortaa Kenneth Høegh qinnuigineqarpoq pisortaanerup suliassaanik isumaginnikkallaqqullugu.
Borgmesterip aammalu Aningaasaqarnermut Ataatsimiititaliap kommunip aqunneqarnerata nutarterneqarnissaanik kissaateqarnertik aalajangernerminnut tunngavilersuutigaat.
Kingusinnerusukkut, tassalu kommunalbestyrelsip ataatsimiinnissaani takkuttussami siullermi kommunaldirektørip atorfeqarnera pillugu inaarutaasumik aalajangiineq pissaaq.
Sulisut ataasiakkaat pillugit suliaq ingerlasoq matumani eqqartorneqarmat kommunimit kissaatigineqanngilaq sukumiinerusimik oqaaseqaateqarnissaq.