Kommune Kujalleq: Angusarineqartartut pitsaanerulersinniarlugit sulissuteqartoqarpoq
Atuarfimmi angusarineqartartut pitsaanerulersinniarlugit sulissuteqartoqartoq, Kommune Kujallermi meeqqanut kulturimullu ataatsimiitsitaliaani siulittaasoq Siumumeersoq Karla Egede Bidsgaard oqarpoq.
- Angajullerni atuartut piumasaqarfigineqalernikuupput, assersuutigalugu atuanngitsuussappata pinngitsooratik angajoqqaat ataasiakkaat kalerrinneqartassapput. Taavalu atuakkerisassat aallunneqarnerulernikuupput.
Taamaattoqarnerani soorunami neriuutigivarput angusarissaarnerullutik atuarfik siunissami qimattalissagaat, Narsap Atuarfiani angusat qaffassarniarlugit qanoq iliortoqarniarnersoq pillugu Karla Egede Bidsgaard taama oqarpoq.
Narsap Atuarfiani karakterit agguaqatigiisillugit 2,025-iupput, Nunattalu atuarfiini agguaqatigiisillugu karaktererineqartuni taakku minnerpaallutik. Tamannalu naammagiinnarneqarsinnaanngitsoq, Nivi Olsen isumaqarpoq.
AAMMA ATUARUK Nivi Olsen: Atuarfeqarfiit iliuuseqarfigineqassapput
Atuarfik ukiuni kingullerni nutarterneqartoq Karla Egede Bisgaard aamma oqarpoq.
Tamanna ilinniartitsisunut unammillernarsimavoq, ilinniartitsisullu arlallit atorfimminnik soraarsimallutik.
- Ukioq kingulleq una atuarfik iluarsartuullunilu allilerneqarnerata atatillugu atuartitsiviit ilaatigut imaannaanngitsoq atuartitsivigineqartariaqartarsimavoq.
Karla Egede Bidsgaard taama oqarpoq, ilanngullugulu oqarluni, meeqqat naggataarutaasumik soraarummeernermi angusarluttut angusarisaasa qaffassarnissaannik ikiorneqassasut.
AAMMA ATUARUK Ataatsimiititaliap Nivi Olsen isornartorsiorpaa
Karla Egede Bisgaardimi meeqqanut kulturimullu ataatsimiititaliami siulittaasuunermi saniatigut Narsami Piareersarfimmi aamma atorfeqarpoq.
Kommune Kujallermi meeqqanut kulturimullu ataatsimiititaliami siulittaasoq Karla Egede Bidsgaard taama oqarpoq.
Narsap Atuarfiata siulersuisui ataatsimiititaliarlu decembarip aallartinnerani ataatsimiissapput, atuarfimmi karakterit qaffassarnissai pillugit suliniutit qanoq ingerlanerat ataatsimiissutigineqassallutik.
