Kommune Kujalleq isumaginninnermut pisortartaarpoq

Kommune Kujallermi aningaasaqarnermut ataatsimiititaliap 44-nik ukiulik Kista Isaksen atorfinitsippaa, Kista Isaksen Qaqortumi inunngorpoq peroriartorlunilu, isumaginninnermullu pisortatut ingerlaannartumik atuutilersumik atorfinilluni.
Assi © : Kommune Kujalleq
Allattoq Jaaku Lyberth, Anton Gundersen Lihn
juulip 24-at 2017 08:23

Kista Isaksen aningaasaqarnermut allaffissornermullu Niuernermik Ilinniarfimmi EVU-mi ilinniarsimasuuvoq. 

2008-miilli Niuernermik Ilinniarfimmi kingusinnerusukkut Campus Kujalliup ilagiligaani ilinniartitsisutut kingusinnerusukkullu pisortatut qaffassarluni 2014-miit ilinniartitaanermut pisortatut september 2016-mi Ilisimatusarfimmi ilinnialernissami tungaanut sulivoq.

- Assut nuannaarutigaarput isumalluarlutalu Kista Isaksen isumaginninnermut pisortatut atorfinitsinneqarmat, Kista aqutsinermik misilittagaqarluartuuvoq suliallu annertusinnaagaluartut tamakkiisumik isiginnissinnaassuseqarluartuuvoq ataqatigiissaarillaqqissuullunilu, tamannalu isumaginnittoqarfimmi aaqqissuussaanikkut nutarteriffigineqaleruttortumi atorfissaqarteqaarput, borgmester Kiista P. Isaksen oqarpoq.

Isumaginninnermut pisortatut atorfimmut tallimat qinnuteqarsimapput.

 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq