KNR TV-p aallakaatittakkani nutarterpai
Namminersorlutik Oqartussat 2012-imi decembari aallartilaartoq aalajangerput, DVB-T-mi kanaalitigut akeqanngitsutigut kanaalit makkua takutinneqartassasut: KNR1, DR1, DR2, DR Ultra (Store Ramasjang) aamma KNR2. DR HD nuannarineqaraluaqisoq taamaatinneqassaaq, DR-illu aallakaatittagaani imarisat allanngortinneqassapput.
- Nammineq aallakaatitassiavut DR-imiillu aallakaatitassiat akuleriisillugit KNR1-imi ullumikkut takutinneqartarput. DR1 ukioq manna 2013-imi DVB-T-kkut kanaalit arlarilissavaat, taamaalillutalu kalaallisut nammineq TV-kkut kiisami kanaaleqalissaagut nammineq suliatsinnik annermik aallakaatitsiffiusumik, KNR TV-mi aallakaatitassiornermi pisortaq Jan Berg oqarpoq.
- KNR1 piffissaq aallakaatitsiffiusoq tamakkerlugu aallakaatitsisinnaanngilaq, taamaammallu ingerlaannaasartumik assigiinngiiaartunillu imalimmik aallakaatisisarunnaarluta immikkuullarissunik aallakaatitsisalissaagut. Tassalu aallakaatitat aalajangersimasumik isikkoqalissapput, aallakaatitsinerit uteqattaarneqalissallutik. Uteqattaarinikkut isiginnaartut KNR-ip aallakaatitaanik ullup unnuallu ingerlanerani piffissani arlalinni isiginnaarnissamut periarfissaqalissapput, assersuutigalugulu DR-imi TV Avisen X Factoriluunniit isiginnaarusukkukku , taava DR1-imut nuuttariaqassaatit, Jan Berg oqarpoq.
DR-ip aallakaatitaanik KNR1-imilu aallakaatitanik qilersugaanani qinigassinneqarneq nutaajussaaq, pingaartumik isiginnaartartunut, kanaalinik arlalinnik qinerliinnarsinnaanermik sungiussisimanngitsunut.
KNR TV aallakaatitanik nunani allaneersunik suli aallakaatitsisassaaq, soorlu meeqqanut minnerpaanut aallakaatitassianik nunanilu tamalaani angisuunik pisimasoqaraangat.
KNR2 Inatsisartut ataatsimiinnerannit suli aallakaatitsisassaaq, taamaanngikkaangat Nunatsinni nunanilu tamalaani pisunit angisuunit aallakaatitsisassalluni.
KNR TV-imi allakaatitsisarnerit nutaat ataasinngorpat januaarip 14-ani 2013 atuutilissapput.
